Na es mundu, nada ka más grandi
ki Statutu y Amor di Mãi. Na un dia ki, na txeu párti di mundu, ta selebradu DIA
DI MÃI, N lenbra di un momentu partikular ki atitudi di nha mãi marka-m pa vida
interu.
Éra na un altura ki poku algen
tinha kuarta klasi (nha pai tinha purmeru grau y nha mãi éra iletrada). Mi N
konsigi, dibaxu di txeu tirsidjadura y insentivus di nha pai ku mãi, txiga na
izami di kuarta klasi. Éra, pa mi, un grandi pasu ki N sa ta daba y N pensa ma
selebrason ta sérba di kel bon ki bale. Entritantu, nha mãi da-m dôs tiston pa
N pô na bolsu y kantu N regresa ku diplóma na mon, N atxa un pratada di
tenterén ta spera-m. N djobe pa nha mãi, N fla-l: mamá, pa bu fidju fase
purmeru y sugundu grau, y kel-li k’é fésta ki bu ta guarda-l!?
Kavakadu, el djobe-m taan, y el
rusponde-m: “nha fidju, nha ponba d’oru! Oxi é kel-li ki nha kondison ta
pirmiti. Mas, ku simenti ki oxi bu kaba di símia, manhan spiga ta disponta,
ngarnel ta labanta, tanboru kapás di transborda”. Dja fladu ma dizeju di mãi é
sima senténsa di juís, ten ki produzi efeitu.
Na altura, N ka ntende sábi kusé
ki nha mãi kreba flaba-mi. Oxi, si profesia realiza y adimirason ku gratidon pa
el bira grandi sima Séu, profundu si Mar, razistenti sima Rótxa.
Obrigadu Mamai, nha Mãi. Na es
Dia di oxi, N krê presta-bu un grandi ominájen, un ominájen ki N krê stende pa
mãi di nhas fidju y nétus, pa tudu mãi na nha família, pa tudu mãi ki N konxe,
pa tudu mãi di mundu.
Si na Séu Diós é más grandi ki
tudu, na Téra, statutu di mãi ki sta pa riba di tudu.
Sem comentários:
Enviar um comentário