Ku Étika y Stétika; Ku Umildadadi, Seriedadi y Umanismu
Tantu
óki kusas stra dretu, komu óki ta mariadu, un sidadon konsienti y konprometidu
debe manifesta si aprovason ô si diskontentamentu. Manera di spresa konkordánsia ô diskordánsia
pode ser un óbra di arti, mas tanbe pode ser un venenu letal.
Un
Krítika ku étika y stétika ta prokura verdadi legal y objetivu, ta fandata
razons di verdadi kontestual y subjetivu, ku ruspetu ta leba kritikadu entende
es dos tipu verdadi y, na prezénsa di konflitu, sen disprezu pa verdadi subjetivu,
prioriza verdadi legal y objetivu.
Étika
di es prosedimentu sta na primadu di valoris, di lei y di verdadi objetivu.
Stétika
sta na pedagojia di leba kritikadudu xinti enpatia ku es verdadi, tantu na
kontestu pozitivu, komu na kontestu negativu.
Natuturalmenti,
na kontestu pozitivu ta ten selebrason y na kontestu negativu ta ten
rapendimentu y dizagravu.
Un
krítika ku umildadi y umanismu, pa alen
di valorizason di lei y di verdadi, el ta valoriza, tanbe, atitudi di ken ki
sa-ta fase krítika.
Na
es atitudi ta spedja amor, dignidadi, sinseridadi, ruspetu, justisa,
solidariedadi, konpanheirismu, kamaradájen.
É
ka faxi fase un krítika saudável, ku tudu es karaterístika.
Txeu
bes, tentason é “lanbe” xéfi y ostiliza subordinadu.
Otu
bes é odja kritikadu komu un santinhu, ô komu un diabinhu, y kenha ki sa ta
kritika komu un juís infalível ki ta pensa ma verdadi sta so di si ladu y ma
kritikadu ka ten alma, ka pode ten opinion, y mutu ménus liberdadi di diskorda.
Más
gravi, inda, é óki kenha ki sa ta kritika un situason negativu, ki el ten
kunplisidadi ku el na pasadu, el ta tra si kabésa di fóra, y el ta dizanka na antigus
“kamaradas” ki nobu kontestu sosial y pulítiku afasta-s di kunpanheru, ô
koloka-s na “trinxeras” diferenti.
Anton,
nos pididu é kel-l: Nu fase krítika ku étika y stétika, ku umildadi, seriedadi
y umanismu.
Facebook
di 20/06/2021
Sem comentários:
Enviar um comentário