sexta-feira, 5 de julho de 2013

Pa Riba la 38º aniversáriu di nos Indipendénsia!


 5 di Julhu di 1975.

 Ku AKA na mô, na Portonzinhu, entrada di Somada, ta fase vijilánsia. FÓRTI ORGULHU di sabe ma na txon di nos TÉRA, na Várzia di Konpanhia, BANDERA di INDIPENDÊNSIA sa ta subiba na mastru y bandera di butupériu sa ta dixiba di puleru. Oxi, 38 anu dipoôs, nos orgulhu kontinua grandi sima mar, rixu sima rótxa, pirsistenti sima raís di tanbarina.

 Obrigadu Kabuverdi, obrigadu nha Povu, obrigadu Kabral ku si kunpanherus di luta, obrigadu “boa guvernansa” pa konkista di dignidadi, pa prusésu di dizenvolvimentu, pa kualidadi di anbienti, pa ruspetu di kumunidadi internasional, pa azagua di rekonstruson y projeson nasional, na txon di nos TÉRA.

Fórti sabura di pode djata, pa obidu na tudu kantu, na tudu txada ku rubera, ma nos é LIVRI sima pasarinha di biku burmedju, sima pónba di péna branku. Fórti N ta ama-u nha TÉRA! Fórti N ta agradiseu-u nha POVU! Fórti N ta ruspeta-u nha KULTURA! Pode ten midjór filisidadi ki kel-li? Pa riba la 38º aniversáriu di nos Indipendénsia!

Sem comentários:

Enviar um comentário