FÓRTI KUSA GALANTI!

Trokadu COVID 19,

                                    Ku maskra tufudjadu na róstu,

                                    Nha Marsu 27, di  es 2020 misgu y miziadu,

                                    Otróra ku fragánsia y sabor di mel

                                    El  dexa di ser daguma y na fimininu

                                    Pamodi flipadu y aroganti

                                    Mondon ku Ramantxadu di mundu

Unilateralmenti es ditermina:

Umanismu y inkluzon sosial

Kredu ô ka kredu, é pa kabadu ku el.

Mas, di fundu di abismu

Ku konsiénsa karapatidu na petu

Obidu un vós ta ratunba, konfianti:

MARSU DAGUMA
(Na Fimininu)
                            

Na Marsu 8, é Dia Internasional di Mudjer;

Na Marsu 21, Mundu ta selebra Arvi y poezia;

Na Marsu 22, é ves di Águ;

Na Marsu 27, nha mãi pari-m;

Na es mésmu data, é dia di nos Kriólas y di Tiatu, tanbe.

Fórti mes daguma, fekundu, abensuadu , própi!

Mudjer ta da lus; Arvi ta da frutu; Poétas y dramaturgus ta kria arti, Agu ta da vida.

Ku amor, ku fekundidadi  di vida,  ku forsa di nobu
Nha mãi finka duedju, po-m na txon
 Nha pai, rai di kontenti, djata, foronperu:
Es prénda-li, ten kor di fodjada:
Na sol, el ka ta murutxa,  na agu el ta da rabénta.

É si ki N nase, é si ki N kre ser:

Ka maltadjadu, nin ka laraxadu;

Diterminadu, trabadjador y ruspetador;
Amigu di nha povu, di si língua y di si kultura.

                Nha mãi ku nha pai ki fase-m si;
                Nha povu ku si stória ki mostra-m kaminhu

                Nha kara-metadi ki  konpo-m manera di ser;

                Mudjeris di tudu rubera ki nxina-m un verdadi:

                Óki nu kansa, nu ta alkansa.

 Anton, na es dia 27 di Marsu daguma,

 Gratidon pa nha mãi, ku nha pai;

 Rakonhisimentu pa tudu Krióla di nha Kutélu,
Ruspetu y dimirason pa tudu mudjer ta rola na mapa
É altu sima séu, fundu sima mar, razistenti sima bazaltu,
Dóxi sima fruta di merada, linpu sima agu di fonti.
Pa ninhun Mondon ku Kanpion ka pensa straga fésta.

             Dja N fla, sta fladu, ku sinseridadi y diterminason

             Pa sabedu na tudu banda, di mundu interu:

             Riba la 27 di Marsu, di tudu ténpu, ku nos mãi, nos raínha,

              Ku nos parserus fépu di jornada,
              Na ruspetu y inkluzon di tudu ser umanu, nos armun, nos similhanti,
              Li-mê, na txon di masapé, más pa la, na txon di Téra lonji!

                                                                                       Manuel Veiga
                                                                                         Marsu 2020