Entritantu, kel noti, [Januáriu] xinti raiba si kabésa.
Detadu na kama, e ka konsigi prega odju nun kusinha. E labanta, e pega lapis y
papel y e komesa ta skrebe:
“Fladu ma bida é kanson
Ma tudu réstu é paxon.
Mas sen bo N ka sabe kanta
Sen bo N ka sabe ama
Unde-u
Rejina?
Unde-u
kretxeu?
Unde-u
amor?
Unde-u nha
flor?
Abri odju pa bu odja
Kurason pa-u xinti
Bóka pa-u pâpia
Mas ka-u fla-m nau!
Sin, na
amor nu ta vive
Na amor
nu ta distranka
Na amor
nu ta konstrui
Na amor
nu ta djuguta.
Tudu kel-li é iluzon?!
Paxon?!
Anton na el N kre vive
Na el N kre móre”.
Januáriu komesa lé kusa ki e kaba di skrebe, mas parse-l ma e ka konsigi sprimi si
sentimentu, sima e ta kreba. Ku raiba si kabésa, e fiitxa papel na mo, e
motxuka-l motxóku, e satadja-l na kuatu padás y e fulha na lixu. Kaba, e sakuta
un bokadinhu, e ozerba ténpu y e rakomesa di nobu:
“Si algun dia N dexa di ama-u
Si algun dia N dexa di kanta-u
Noti ka ta manxe
Y sol ka ta sai
Na dór ô
alegria
Na pás ô
géra
Nha
ideal...
É ser leal
Kridita!
Midita!
Ka-u duvida, non
Pamodi...
Bóka ki pâpia,
mas ...
Kurason ki
xinti
Y mo ki skrebe
Pa obidu obi
Rejina! Rasebe es kanson
Di párti di kurason
Y ben fla-m
abertamenti
Ma-u ta ama-m sinseramenti”.
Sem comentários:
Enviar um comentário