NOS BANDERA

Kriolu y kriolidadi é nos Bandera
É Áfrika ku Európa karapatidu, strammadu na kunpanheru

Manuel d’Novas dja flaba, y é simemé:

“… Nos é rasa prétu ma brónke burnide na vente

Burnide nun tenporal di skravatura…”.

Nu nase stramadu, nu kria burnidu, “gerrotxóde”, nu bira kriolu:

Na sangi, na língua, na stória y kultura, na vivénsia…

Fórti grandi dja nos é!

Sangi di dos kontinenti, stória y kultura tenpradu na diversidadi.

Kumunhon di diversidi, kritikamenti konstruídu y kultivadu

É kel-la ki ta faze-nu grandi, é kel-la nos rikéza, nos diferénsa

Ki diáspora y artistas kriolu viaja ku es, na “mala di emigranti”,

Mas, tanbe, na melodia di mórna y kórdas di violon.

Un letradu distraídu fla ma kriolidadi ka ta leba-nu pa ninhun lugar

Óra, nos ki ka kre koloniza nen dumina ningen

Ka nu fadiga ku es diklarason fatéla
Basta ki ku nos kriolidadi nu alkansa y nu nada na tudu nos Baia

Basta ki mundu global kontinua ta studa y ta ensina nos realidadi

Ki nos diápora y otus Cesária ba ta transporta-l na melodia di mórna

Ki Cidade Velha ka perde statutu di Patrimóniu di Umanidadi

Ki kualidadi di nos literatura pasa ta interesa tradutoris y editoris di globalizason

Si tudu kel-la kontise é pamodi Kriolidadi é NOS BANDERA

El é nos esénsia, nos identidadi spesífiku

Anton, nu defende-l, nu valoriza-l, nu ama-l.

Na verdadi, si nos é nos, é un nosentésa nega nos própi kabésa

Tudu ki é konkista puzitivu di otus povu ta interesa-nu, kritikamenti

Tudu ki é konkista di nos povu debe interesa-nu vitalmenti

Y é pur isu ki kriolu y kriolidadi, NOS BANDERA, nu kre odja-s riba la.

                                                  Manuel Veiga, 28/03/2020