KRIOLU - NOS ORGULHU
Oji, 18 di Otubru,
Nhu Eugénio Tavares é aniversarianti.
Es data enblemátiku
foi skolhidu pa DIA NASIONAL DI KULTURA.
É di kes
midjór omenajen pa puéta-skultor y kultor di mórna y di kriolu.
Antis di el, foi
António d’Paula Britu, ku si purmeru gramátika di kriolu;
Dipôs, nu ten
Napoleão Fernandes, ku si purmeru disionáriu
Y Pedro Cardoso ku si
Folklóri Kabuverdianu
Sigidamenti, foi bes
di B. Léza, di Sergio Frusoni, Ovídio Martins y Luís Romano
Más tardi, surji Dulce
Duarte, Kaoberdiano Dambará y Horácio Santos;
Na mésmu trinxera,
Násia Gomi, Kodé di Dóna y Ntóni Denti d’Oru koloka ses pédra
Di mésmu fórma Manuel
d’Novas, Anu Nobu y Kaká Barbóza fase, tanbe, ses simentera
Un
simentera ki, oji, alguns otus konpatrióta, "pó di téra", sa ta da
kontinuidadi.
Entritantu,
defensor más grandi di kriolu é nos POVU:
El fala-l y el
utiliza-l na sábi y na kasábi; na trabadju y na kritividadi.
Juventudi, el, e
brasa kriolu na redis sosial y na konkista kretxeu di ses vida.
Alguns letradu y
pulítikus, gó, kes ki pode disidi, es TUNTUNHI,
Es ranja falsus argumentu,
mas un dia kórda al rabénta y agu al
futi na labada
Ku kuskú nsokadu na
garganta, ku txiku spértu ta presta kónta na Tribunal di povu.
Si na Konstituison di
Repúblika fika konsagradu realizason di paridadi Kriolu/Purtugês,
Pamodi ki, na prátika,
gó, pulítikus sa ta pasa povu kalaka, sa ta da-l so pa dodu?
É ka nobidadi
konstata ma, na kanpanhas eleitoral, kriolu ta reina
Na tudu txada ku ladera, na kanpu, amás na
sidadi ta pidi vótu di tudu eleitor
Mas, unbês na puder,
kriolu ta dixi di tronu na tudu ses
komunikason formal.
Al txiga un dia ki artigu nonu di
Konstituison ta dexa di ser létra mortu ;
Al txiga un dia ki pulítikus ta prende ser
koerentis y konsekuentis ;
Al txiga un dia pa
sistéma di ensinu pasa ta okupa di tudu dos língua di Repúblika.
Si oji nu ta selebra
Dia di Kultura ku dór na petu y burgonha di Nhu Eugénio,
Si oji nu ta verifika
ma simentera di kriolu inda ka jermina frutu ki nu kre,
Nu ten fé ma, ka ta
dura, na porton di nos ilha, nu ta sisti “o bater da chuva amiga”
Y, ku António Nunes,
nu ta sisti un nobu azágua di Kriolu y di Kabuverdi
"Déntu sol ka ta murutxa, déntu d'agu ta da rabénta":
Ku “… barudju di mákinas ta korta; ku agu
ta kóre na labada grandi;
Ku plantas ta frutxi-frutxi; ku trapitxi ta pila; ku txeru di karasbédja stontianti y kenti
Ku vontadi
di valoriza nos língua y ku speransa firmi di alkansa un patamar más dignu.
Óki sonhus di António
Nunes konkretiza, Dia di Kultura ta bira un FÉSTA BÉDJU,
Nos tudu nu ta labanta róstu, ku kurason kontenti,
ta péki-péki, y ku KRIOLU riba la.
Ti la, é pa nu ba ta
luta, é pa nu ba ta razisti, é pa nu ba ta símia VIDA y kriatividadi.
Y ku diterminason, é
pa nu ba ta KULTIVA PALAVRA Y VÉRBU, di y na KRIOLU.
Praia, 18/10/2020
Manuel Veiga
Sem comentários:
Enviar um comentário