FÓRTI BITXINHU
RUNHU
Ku nómi stranhu di Covid 19
Ku dizaforu ku tudu, bu txiga.
Bu entra sen pidi lisénsa
Bu molesta disprivinidus
Tudu kenha staba sen maskra
Tudu algen ki ndjutu
distansiamentu
Y nen ka preokupa ku laba mon.
Fórti runhu, bitxinhu di mérda !
Dja da-nu fastiu di bo.
Fla-nu pamodi tudu es runhésa?
Bu da kabu di saúdi, ku sistéma
di idukason
Bu provoka falénsia y dizinprégu
na ekonomia
Setor di turismu y di kultura
panha trankada feiu
Mas nos raziliénsia é más fórti
ki bu runhésa.
Nu al vense-u, nu ten ki vense-u,
nu ta vense-u.
Bu sta skolégu ku disgrasa
konsigidu:
Dja bu ataka Prizidentis y Xéfis di Guvérnu
Dja bu mata milhons di koitadu,
na mundu interu
Mas sa ta djobedu vasina, manenti,
pa po-u barbitxi.
Na konfinamentu, txeu dja
rakupera
Na prevenson txeu sa ta razisti
manenti
Nu ka pode fika paradu, nin
indiferenti
Nu ten ki inventa fórmas di lida
ku bo.
Mi, na situason di raformadu, N ka
sta paradu:
N sa ta le, N sa ta skrebe, N sa ta
midita.
“Letras que Imortalizam” é
nha livru más rasenti.
Si un dia frónta panha-m, dja N vinga dja di bo.
Konfinamentu obriga-m símia y
spiga dja ganha gran
Bu kre ô bu ka
kre, kontise u-ki kontise
“Letras Que Imortalizam” ben pa fika.
Pa tudu nhas armun, na mar
di kanal y na téra-lonji
Pa tudu ser umanu spadjadu na mapa
y na planéta
Nu sigi orientasons di
autoridadis sanitáriu y di OMS
Nu djunta mon kóntra Covid 19 y
si rabesindadi
Nos Morabéza é más
fórti ki si kabalindadi.
Praia, 4 di Seténbru di 2020
(Dia ki Kabuverdi sa ta konta ku
6.360 kazu akumuladu di infetadus; 64 di kazus nobu; 65 óbitu, di Marsu pa
gósi).
Sem comentários:
Enviar um comentário