STRÉLA NHU SANTIAGU

 

TANBORU NHU SAN-DJON

 

Di riba Piki-Ntóni obidu un djatu,

Di alegria y kontentamentu:

El zuni na fundu Rubera Njenhu

El lastra di Djarfogu kanba Djabraba

El ratunba na Djarmai, na Boavista y Dja-di-Sal

El txiga na Sanbisenti, amás na Santanton y Sanikolau.

 

Éra un batukada pa selebra NOBU ANU ki sa ta txigaba;

Éra un sinfonia, asvês, na konpasu kenti di funaná y kotxi-pó;

Éra un melodia, otus bes, na son kadensiadu di mórna ô koladera.

 

Ku butupériu  y tirsidjadura di 2020 ta foga na mar

Un nóba kaba pa txiga ma 2021 ta sérba diferenti:

Sen pandemia, sen Covid 19, sen máskra, sen konfinamentu.

Ku trabadju pa ken ki kre y unidadis di produson ta funsiona.

Ku minus na skóla y studantis na liseu ku universidadis.

Ku avions ta buâ y barkus ta txiga y ta parti, sen modi-l para txeu.

Ku gentis kontenti, ku jovens alégri y ku mininus ta brinka, sábi pa frónta!

 

Foi Stréla Nhu Santiagu ki, di lonji, traze es nóba, es albisa di speransa.

Foi tanboru Nhu San-Djon ki spadja-l pa tudu banda, pa tudu béku ku beléku.

Anton, tadju ka ten: kusas al muda, sa-ta muda, kusas ten pa muda.

Kel-li é nos sonhu, é nos vótu, é nos sertéza: "finta distinu" é nos distinu.

 

Pa ningen ka perde koraju. Pa nos tudu sigi stréla di Nhu Santiagu

Pa tanboru di Nhu San-Djon txiga na tudu lar, na tudu lokal di trabadju

Pa nos Téra, y Mundu tudu fépu, torna bira ku kor di fodjada.

Pa 2021 traze-nu  más Saúdi, más Pás, más Lus, más Amor, más Dizenvolvimentu.

Y ki stréla di Nhu Santiagu, ku tanburu Nhu San-Djon, ka skese di nos.

 

NATAL SUFRIDU, sen Fésta Bédju, es anu di 2020!

NOBU ANU, gó, di 2021, ku speransa,  ku agu ta kóre na labada

Ku fruta y spiga ta disponta bisós, é nha VOTU pa nhos tudu fépu:

Nha povu, nhas amiga ku amigus, nhas armun di sangi y di kondison umanu.

 

                                                                          Dizénbru 2020

                                                                           Manuel Veiga