Fórti
Kulpa Rixu!
Sénpri N pensa ma, na es
kanbar di di 2020, disgras más grandi, ki kontise nos Povu, éra Covid 19.
Fórti nganadu N staba. Tudu
sa-ta indika ma frónta más grandi ki txiga na nos Téra, é korupson ki
dja bira (ô sa-ta parse) kuazi ofisial,
kuazi institusionalizadu, ku tendénsia, talvês,
pa ser mésmu “legal”.
Purmeru foi denúnsia di
adivogadu Felisberto Vieira Lopes. Sigidamenti, adivogadu Rui Araújo, ku bazi documental,
kontinua ku denúnsia komesadu pa Vieira Lopes.
Na nha “nosentésa”, N
pensa ma denúnsia di un korupson, ki kre bira “máfia”, éra so kel-la. Oxi, N abri internet y N da ku un “site”
stranjeru “a denúnciar Lobbies a favor
de amigos e famílias…[infleuentes”, posivelmenti ku “benson” di ken ki pode disidi.
Más un bes, nha “nosentésa”
ta fla-m ma é ka verdadi, ma é tristi di más pa sa-ta kontise.
Mi, própi, N kre pa tudu
ser “fake news”. Óki povu po-nu xinta na kadera di puder é pa nu ser si
raprizentanti, si defensor, si justu intermediáriu. Uza di puder di influénsia
pa txupa sangi di povu, é krimi.
Ta kotisi ki, na un Stadu
di Direitu Demokrátiku, sima kel ki nu ten na Kabuverdi, Ministériu Públiku
debe investiga denúnsias y fla-nu undi ki verdadi sta.
N ta spera ma, na es NOBU
ANU ki sa ta komesa, nu ta fika ta sabe kal ki é nos disgrasa más grandi: si é
Covid 19, ki dja atxadu vasina pa konbate-l; si é korupson institusionalizadu
ki dja komesa ta denunsiadu.
Nos, na nos “nosentésa ô
sabidésa”, nu ta kontinua ta pensa, nu ta kontínua ta pidi tudu santu di mundu
pa el ser un “fake news”.
Ken ki ten dever di sklarise
povu, na un Stadu di Direitu Demokrátiku, pa el ka dexa di fase-l.
Kazu kontráriu, el tanbe
el ta kometeba un krimi, ton marmi sima kel di “korupson institusionalizadu”.
Dizénru di 2020
Manuel Veiga
Sem comentários:
Enviar um comentário