segunda-feira, 10 de agosto de 2020

DJA TXIGA TÉNPU DI FLA "BASTA"

 


Di tudu banda, notísias sa ta txiga foradu:

Di Nórti, di Sul, di Lésti, di Oésti.

Kabuverdi, nha téra, ka eseson.

Di Santanton, kanba Brava, si é ka ónti, é oji

Si é ka na prinsípiu d'anu, é na meiu ô na fin.

 

Fórti kusa galanti! Kel-la, gó, é ka kultura

É trabesura ki ka ten perdon.

É si própi: furta soris di otu algen é krimi di propriedadi

Furta intimidadi y pratika “VBG” é krimi kóntra Kriador.

Na verdadi, nu nase livri y ku don di livri arbítriu

Nu pode skodje, nu pode opta, nu pode seta, nu pode rakuza.

Furta intimidadi ki na kriolu é furta k…

Sikrê vítima é kriansa, jóven ô adultu

É konporta sima animal ki ta ragula pa instintu

Ki ta diskonxe lei di dignidadi y di livri arbítiu,

Ki ta dispreza ónra y liberdadi di ser umanu.

 

Dja txiga ténpu di fla: Basta!

 

Ladron di intimidadi y pratikanti di “VBG”,

 Nu ka kre-s djuntu ku nos:

Nin na kalabosu, djuntu ku prézus di dilitu komun

Nin julgadu pa justisa di Stadu di direitu.

Kusé al fasedu ku kriminozus di furta k… y di “VBG” ?

 

Es meste konfinadu, es ku es, na un ilha dizértu;

So si es ta prende ruspeta ónra y dignidadi umanu;

So si es ta pode ridimi di ses trabesura y  rabesindadi.

Komu sidadon di mundu, komu kriolu kabuverdianu

N kre presta nha solidariedadi pa tudu vítimas:

Kriansas, jóvens, adultus di tudu banda, di tudu kantu di mundu.

 

N kre apela, tanbe, pa nu djunta-mon na edukason:

Na família, na skóla, na trabadju, na kultu di fé, na atividadis síviku.

Ken ki vense trabesuras di anbienti y di pulítikas suju,

Ken ki konverte pédra na pon y tirsidjadura na reziliénsia

Suguramenti, ta sabe libra y proteje vítimas di “VBG”.

Kel-li é nha sonhu, é nha dizeju, é nha speransa.


Agostu di 2020, Manuel Veiga



 

Sem comentários:

Enviar um comentário