FINTA DISTINU

 NA KABUVERDI UN PROFESOR KI KA SABE KRIOLU (FORMAL Y SPLISITAMENTI) DIFISILMENTE EL PODE SER UN BON PEDAGOGU

• Un profesor ta trabalha ku língua y ku linguájen, na transmison di konhisimentu.

• Y si língua matérnu é spasu undi propriedadi di linguájen ta atinji densidadi más grandi y más apropriadu,

• Un profesor é más profesor y é más pedagogu óki e ta dumina língua matérnu di si alunus.

• Kel-li pamodi el ta enkontra «le mot juste», palavra y spreson adekuadu pa pasa un mensájen, pa traduzi un konseitu y pa diskubri un sentidu, óki alunu é ka kapás di diskodifikason na língua ki konhisimentu sta veikuladu.

• Kel-li, inda, pamodi dianti di un eru provokadu pa interferénsia di língua matérnu, profesor ta konsigi leba alunu konprende razon di éru y, sobritudu, stratéjia pa evita kel mésmu éru na futuru.

• Un profesor ki ka konxe língua matérnu di si alunus, el pode ser un posu di sabedoria, mas difisil ô raramenti el ta konsigi ser un bon pedagogu.

• Anton, studu di língua matérnu, pa alén di ser un inperativu identitáriu y di Nason Global, é un bon kaminhu pa un pedagojia efisienti y di kualidadi.

AMIGU PROFESOR: Bu mison di ensina kriansa lé y konprende mundu é rai di grandi, rai di inportanti. Studa si língua matérnu pa bu pode otimiza bu MISON. Kazu Ministériu di Edukason sa-ta fase di ségu, surdu y mudu, bó ki kre ser un bon pedagógu, un bon fasilitador, djobe fórma di bu anda ku bu própi pé.

Na txeu okazion, nos povu prende "finta distinu". Dja txiga óra di bu mostra ma bo, tanbe, bu sabe finta distinu.