NHU NAXU KI FLA: DJA TXIGA TÉNPU DI MUDA KAPITON DI BARKU

 

Kapiton skodjedu pamodi el promete "rasta nguka" y fase milagri:

• Ranja trabadju pa tudu ken ki kre trabadja. El ka kunpri.

• Posibilita formason pa tudu kenha ki ten fómi di konhisimentu. El ka kunpri.

• Konverte azágua di txuba na azágua di enprendedorismu di amigus y sinpatizantis. El kunpri.

• Liga ilhas entri es, y Kabuverdi ku mundu, ku un fróta grandi di avions (11,5). El ka kunpri.

• Privativa TACV sen kontratu, mas ku grandi vantájen pa «mondon ku kanpion». El kunpri.

• Dexa di invisti na infarstrutura di beton pamodi el e ka ta mata fómi. El kunpri.

• Kaba ku prugrama di “kaza pa tudu algen” pamodi solidariedadi debe ser so ku ken ki sta na barku di kapiton. El kunpri.

• Kaba ku konkursus pamodi karton di militánsia é más ki sufisienti. El kunpri.

• Kema ativus inportanti di pasadu pamodi modernismu ka pode onbra ku stória. El kunpri.

• Númia enbaxadoris-militanti y pô kes di karera na pratilera. El kunpri.

• Kaba ku prujétu di ensinu bilingi pamodi língua matérnu ka pode onbra ku ninhun otu língua di globalizason. El kunpri.

• Númia kuadrus pa kor di ses kamizóla y nãu pa valénsia di ses diplóma. El kunpri.

• Dexa barku kóre na mar, “sen djobe pa ladu”, pamodi ki ta konta é so ken ki sta na kamaróti. El kunpri.

Si tudu ki Nhu Naxu fla é simemé, anton é pamodi ténpu di muda kapiton dja txiga. Na 18 di Abril Povu ki ta disidi, ku verdadi, ku étika, ku patriotismu, ku inkluzon, ku odju ragaladu pa tudu banda, pa nada y ningen ka fika di fóra.

Y ken ki passa ta konduzi barku pa el ka skese ma dia di balansu ten, y ma, na óra di ndjusta kónta, karton di militánsia ka ta sirbi pa koloka vótu na urna.

Tudu kel-li, Nhu Naxu ki skuti na si kabésa. Si el ten razon, ta da-nu kabaku. Si el falta verdadi, é pa nu muda di “Ali-Ben-Ténpu”.