Obrigadu nha família, nha povu, nhas amiga ku amigus!
Dia 27 di Marsu foi un data diferenti pa mi, ku más karinhu, más amizadi, más vontadi di ser más y midjór.
Pa kel-la, foi y é fundamental “balai” di prezenti ki nhos gazadja-m ku el.
Oksijenadu móda N fika, trokadu karinhu di nhos tudu fépu, suguramenti, nha azágua di filisidadi y disabedoria fika ku más agu, ku más lus, ku más tutanu, y spiga di midju, tanbe, sa-ta ba ta ganha más gran y más bianda, manenti-manenti.
Ka ta da pa N agradise-nhos, un pa un. Nhos seta-m es téta amigu y es jéstu daguma, di fundu di nha petu, dirijidu, globalmenti, pa nha família, nhas amiga ku amigus ki lenbra di mi, nha povu ki tioxi ka skese ma 27 di Marsu é Dia di nos KRIÓLAS, ma el, tanbe, é dia ki nha mãi finka duedju na txon, pari-m KRIOLU, ku mison di djunta mon, ku nhos tudu fépu, pa midjora y kualifika azágua di nos POVU y di nos TÉRA.
Kel-li é razon pamodi mi é “dodu” na kada un nhos. Tudu kel-li é razon pamodi nha AMOR pa nhos “é altu sima séu, é fundu sima mar, é rixu sima rótxa, é dóxi sima mel di begera”.
Manuel Veiga
Sem comentários:
Enviar um comentário