Altu sima Séu, Fundu sima Mar, Largu sima Mundu

(Un xeirinhu modi kriolu autonoiza na txon di nos Téra)

Pedrinhu nase di sangi di branku “brutxidu” na inerjia di negru. El é kriolu, si Téra é Kabuverdi, si kultura é kabuverdianu. Na si DNA, Nórti  ku Sul karapati na kunpanheru, kalanbetxa un na kelotu, ti forma un alma nobu, más riku ki Nórti, más fórti ki Sul – un ser global ki ta vive y ta konvive ku si raízis  na toleránsia, na diversidadi, na buska di armonia. Y kel-li na un prosésu sen ténpu-l kaba, sen modi-i para.

Pedrinhu ten konsiénsia di si stória, el ten orgulhu di si identidadi. Un stória di sufrimentu ki pari un antropolojia kriolu riku na gramátika di ser y fekundu na sintasi di vida. Di es gramátika y di es sintasi surji nos fórma di interpreta mundu y nos manera di relasiona ku Séu y ku téra. Kada bes más, Pedrinhu ta xinti un xamamentu pa si stória, pa si língua y pa si kultura.   Es amor, es sentimentu patriótiku, é sima ar ki e ta raspira. Kustu ki kusta, e kre koloka-l riba la na poleru, ku txuba korenti, ku azágua fadjadu y ku kodjéta abundanti.

Es amor inda é ka un simentera di midju ku fixon, mas sin un azágua di stória y di kultura, na un  jornada undi  labrador é nos tudu y kodjéta, pa ser fadjadu, nu ten ki djunta mon: na família, na skóla, na igrejas, na asosiasons, na sidadania... Pedrinhu, el, e nase kriolu, e bira kabuverdianu y e sa ta transforma, manenti, na sidadon di mundu. É pur isu  ki si orgulhu  na storia, na  língua y na kultura di si povu dja bira altu sima séu, fundu sima mar, largu sima mundu (Cf. Formação do Crioulo – Matrizes Originárias:2019:426).