Purgunta di Maria Cushing

Purgunta di Maria Cushinng na Méza-Rodondu di Massasoit:

“Pamodi ki kriolu é difísil di skrebe? Pamodi ki ka ten skóla di kriolu na Kabuverdi?”

Raspósta: Difísil é kusa ki nu ka prende, ki nu ka sabe. Antis di nu prende gia un karu, konduson é difísil. Óki nu prende, el é faxi. Ken ki ka prende, di fórma sistemátiku y abranjenti, alfabétu kabuverdianu (ô kalker otu alfabétu), é natural ki si e komesa ta uza-l, e ta atxa-l difísil. Alfabétu kabuverdianu, pa si funsionalidadi, pa si ikonomia y pa si sistematisidadi é un alfabétu prátiku y di aprendizájen rápidu. Mas nu ten ki konxe-l, nu ten ki prende-l. El é más faxi ki alfabétu purtugês ô inglês. Si es dôs alfabétu-li ta parse-nu faxi, é pamodi, di fórma sistemátiku, nu prende-s.

Na es rapósta ki N sa ta da-nha, kada palabra, kada konstruson sta enkuadradu na régras própriu. Mas nu ten ki konxe tudu es régra. Si nu ka konxe-s, nu ka pode fla ma skrita di kriolu é difísil. Sinplismenti, ken ki ka studa-l, ka konxe-l. Purtantu, kiston ka sta na ser faxi ô difísil.

Na Kabuverdi dja sa ta studadu kriolu na Universidadi Públiku. Inda ka masifikadu  es ensinu pamodi, antis di kel-la,  nu meste forma profesoris. Dja nu sa ta da purmerus pasu. Kaminhu sa ta fika kada bês más kurtu. Mésmu ki oxi nu sta na komésu di subida, un dia nu ta sai txada. Pasu-pasu y na rumu sértu. Ka ten tadju!