Dja N sta di vólta, mas ku gana di torna volta, pa djuntu di nos kumunidadi na USA. N rasebedu sima un "prínsipi", móda un irmãu. Obrigadu Konsuladu Jeral pa konviti y organizason di evéntu, obrigadu Manuel da Luz y Agnelo Montrond pa palavras di akolhimentu y di aprizentason, obriga Inês Brito pa informason sobri pulítika linguístiku na Kabuverdi, obrigadu Massasoit College pa ospitalidadi, mas sobritudu obrigadu nha povu pa karinhu y pa vi...vu interesi na dibati a vólta di "Kriolístika na Kabuverdi - un Prusésu, un Dizafiu".
"It was great... I loved it! ... Nha peli, nha nomi, nha morada". Foi si ki Maria João T. Barbosa klasifika enkontru di Massasoit.
Un otu partsipanti, Neusa Araújo, afirma : "It was very empowering and reinforced the need to continue to have these discussions and let it be known that changes will take place soon, regardless if we are all on board or not. I have a perception that still many Cape Verdeans in CV are not, or maybe, little aware of this development in the history of CV and it seems that this idea is much more embraced in the US than in CV itself".
Prezada Neusa: É pur isu ki nos kumunidadi, elementu fundamental di nos Nason Global, é nos oru, é nos diamanti.
Kada bês más N sta más konvensidu ma dinámika di nos kriolidadi ka ten frontera, ka ten limiti: el nase di enkontru di Purtugal ku Áfrika, mas oxi el sa ta projeta na enkontru di Kabuverdi ku Mundu. Obrigadu diáspora kabuverdianu pa es oru y pa es diamanti kultural y vivensial.
Brevimenti, nha kumunikason ta ser publikadu na nha blog, ku link pa facebook. N ta ben sforsa tanbe pa ben da raspósta, através di facebook, pa tudu kes purgunta formuladu pur skritu y ki N ka rusponde, pa falta di ténpu. Un bês más, obrigadu kumunidadi kabuverdianu na Mérka y un téta rixu, li di txon di nos di nos Rubera, di nosTéra - KABUVERDI.
Sem comentários:
Enviar um comentário