Purgunta di Jose Monteiro na ánbitu di
Méza-Rodondu di Brockton:
“Kal ... ten sidu raspósta di kabuverdianus na Európa en relason a
ALUPEC? Ten
algun propósta pa inova ô pa substitui
ALUPEC pa un otu sistéma?”
Raspósta: Na Európa, sima na
Kabuverdi ô na Mérka, prosésu di afirmason y valorizason di nos língua matérnu
sta en kursu. Ten várius difensor di
ALUPEC, mas tanbe ten alguns ki ta difende spiriénsa antigu di skrita.
Movimentu en favor di ALUPEC, ki désdi 2009 institusionalizadu komu Alfabétu
Kabuverdianu, é kada bês más grandi. Alguns ason konkrétu:
1) Txeu
disertason y várius tézi di dotoramentu difendedu ô sta en preparason na
Universidadis di Európa; 2) Ten várius spiriénsa di ensinu, partikularmenti na
Purtugal; 3) Ten traduson di livrus y di pésas di tiatu pa kriolu y na ALUPEC;
4) Na Kabuverdi, na Alemanha y na Fransa publikadu disionárius ku bazi na ALUPEC; 5) Na Purtugal
kaba di publikadu dôs nunbru di Banda Dizenhadu “Largo Wintch”, ku bazi na
ALUPEC; 5) Na Olanda dja sta na fazi final di publikason un otu livro di Banda
Dizenhadu sobri “Tintin”; 6) Alguns profesor kabuverdianu y stranjeru partisipa
na kursu di Kriolístika y Língua Kabuverdinu di Uni-CV.
Relasionadu ku purgunta sobri si ten algun
popósta pa inova ALUPEC ô pa substitui-l, N ta sklarise: Na es momentu ten un
propósta, ki é di-meu, pa introduson di
létra “C” na ALUPEC pa skrita di nómis própriu, di siglas, di markas y sínbulus internasional, sima : Carlos, CPLP,
TACV, Vitamina C, cm, etc.
Ten inda propósta pa midjoramentu di sistéma
di acentuason y ki sta sta rezumidu na dokumentu “Acentuação num CLIC”,
publikadu na nha blog odjudagu.blogspot.com.
ALUPEC é un projétu
abértu. Tudu propósta konsistenti y ki ta kualifika ô potensializa modélu fonolójiku ta analizadu ku
tudu abertura.
Sem comentários:
Enviar um comentário