KONSTITUISON
DI KABUVERDI, NA LÍNGUA DI TÉRA - St
Na ánbitu di Kursu di Kriolístika y Língua
Kabuverdianu, N inisia dizafiu di da disiplina di “Traduson Tékniku y
Sientífiku”, na sigimentu di “Tékinikas y Metodolojias di Traduson”, ministradu
pa un spesialilista ki ben di Canárias,
Prof. Maria Victoria Domínguez Rodríguez.
Na es spiriénsa, N da kónta di difikuldadi di
traduzi y N lenbra di kel frazi ki ta fla “traduttore,
traditore”. Entritantu, N atxa es dizafiu un trabadju kontajianti y el pintxa-m
pa un nobu dizafiu di da “Traduson y Tékinikas di Spreson di Kriolu”na kursu di
jornalismu di Uni-CV.
Ku es dôs spiriénsia, da-m gana di entra na
un nobu dizafiu: Traduson di Konstituison di Kabuverdi na língua di Téra. N
sabe ma é ka taréfa faxi, mas algen ten ki da purmeru pasu. Pur isu, N disidi,
através di Facebook, da más un próva di sidadania linguístiku. Sima António d’Paula
Brito, na 188, fla na si trabadju fundador di nos gramátika (“Apontamentos para
a Gramática do Crioulo que se Fala na Ilha de Santiago de Cabo Verde”), “nhos menda éru ki nhos atxa, nhos lima
falta ki nhos enkontra, mas nhos menda y nhos lima ku ku justisa y ku razon”
(adaptason na ALUPEC).
Na post sigintis, N ta komesa traduson
di Testu di Revizon Konstitusional di
2010, di Preánbulu ti artigu 295o.
Konstituison di Repúblika di Kabuverdi
(KRKV), na Língua di Téra
PREÁNBULU
Proklamason di Indipendénsia Nasional é un di
kes momentu más altu di Stória di Nason Kabuverdianu. El é promotor (fator)
d’identidadi y di reanimason di nos kondison di povu, un povu dipendenti di subi
ku dixi di kaprixus di distinu, mas ku
firmi speransa di kria na nos Téra
kondisons di un vida dignu pa tudu
algen. Indipendénsia pirmiti, inda, ki
Kabuverdi pasa pa ménbru, ku tudu direitu, di kumunidadi internasional.
Entritantu, afirmason di Stadu
indipendenti ka kontisi omésmu ténpu ku
inplantason di rijimi di demokrasia pluralista, dja ki organizason di puder
pulítiku staba ku raís finkadu na filozofia y prinsípius ki ta karateriza
rijimis di partidu úniku.
Azágua di puder, na kuadru di es
mudelu, mostra, di manera jeral, nisisidadi di introduzi alterasons profundu na
organizason di vida pulítiku y sosial di Stadu, na tudu kau undi es rijimi
inplantadu. Ideias nobu lastra na mundu y provoka kéda di struturas y konsepsons ki ta parseba ma staba ku raís
finkadu y, di es manera, orientason di akontisimentus pulítiku di mundu muda.
Na Kabuverdi, anunsiadu abertura
pulítiku na 1990 ku kriason di kondisons institusional nisisáriu pa purmeru(s) eleison lejislativu y
prizidensial, na un kuadru di konkorénsia pulítiku.
Foi di es manera ki, na data di 28 di
Seténbru, Asenbleia Nasional Popular prova Lei Konstitusional no 2/III/90
ki ravoga artigu 4o di Konstituison,
institusionaliza prinsípiu di pluralismu
y inplanta un nobu mudélu di rijimi pulítiku.
Es Lei,
kriadu pa sirbi di instrumentu pa viabilizason di eleisons demokrátiku y
pa tranzison pa un nobu mudélu di organizason di vida pulítiku y sosial di
país, el ka dexa, entritantu di
institui un sistéma diferenti di guvérnu
y un otu fórma di di izersísiu di vótu, na véspra di eleisons pa un nobu asenbleia
lejislativu.
Foi na es kuadru ki realiza purmerus eleison
lejislativu, na Janeru di 1991, sigidu, na Febreru, pa eleisons prizidensial.
Un partisipason spresivu di populasons na es eleisons dimonstra, klaramenti,
opson di país na sentidu di mudansa di rijimi pulítiku.
Entritantu,
kel kontestu stóriku partikular undi, através di di revizon parsial di
Konstituison, rekonhisidu ma partidus é prinsipais instrumentu di formason di
vontadi pulítiku pa guvernason, fase ki
demokrasia pluralista kontínua ta konvive ku régras y prinsípius própriu di
rijimi antirior.
Apezar di realidadi sosial y pulítiku ki sa
ta viveda, país staba na un prusésu di
transformason rápidu y profundu, asumidu pa un parti di populason y pa forsas
pulítiku ki komesa ta surji di valoris ki ta karateriza un Stadu di
Direitu Demokrátiku y ki, pa si kontiudu, ta konfiguraba dja un mudélu material ki inda ka staba na testu di
Konstituison.
Anpôs, es prezenti Lei Konstitusional krê
dota país di un kuadru normativu ki ta
bale, non partikularmenti pa armonia ki ta atxadu na testu, mas pa kel nobu mudélu instituídu. Opson pa
un Konstituison di prinsípius struturanti di demokrasia pluralista, si nu dexa
di fóra opsons konjuntural di guvernason,
el ta pirmiti stabilidadi
nisisáriu pa un país di fraku rekursus y
altenánsia pulítiku sen ajitason.
Ku asunson di tudu prinsípiu di soberania
popular, es testu li di Konstituison ta konsagra un Stadu di Direitu
Demokrátiku, ku un grandi katálogu di
direitus, liberdadis y garantias di sidadãus,
konseson di dignidadi di pesoa umanu komu un valor abisolutu ki sta pa riba di própriu Stadu. El ta
konsagra inda un sistéma di guvérnu ku ekilíbriu di puderis entri divérsus
órgãus di soberania, un puder judisial fórti y indipendenti, un puder lokal ki
titularis di ses órgãus é eleitu pa pa
kumunidadis y é responsabilizadu dianti di es mesmu kumunidadi. El ta difende
un Adiministrason Públiku ki ta sirbi sidadãus y ki é pensadu (concebido) pa
ser instrumentu di dizenvolvimentu y un sistéma di di garantia di diféza di
Konstituison ki ten karaterístikas di un rijimi di demokrasia pluralista.
Di es manera, es Lei Konstitusional ta ben, formalmenti,
korporiza kes profundu madansa pulítiku
realizadu na país y kria kondisons institusional pa izersísiu di puder y
di sidadania, nun klima di liberdadi, di pas y di justisa ki é fundamentu di
tudu dizenvolvimentu ikunómiku, sosial y kultural di Kabuverdi.
PARTI
I
Prinsípius
Fundamental
Titlu
I
Sobri
Repúblika
Artigu
1º
(Repúblika
di Kabuverdi)
1. Kabu Verdi é u Repúblika soberanu,
unitáriu y demokrátiku, ki ta garanti ruspeu pa dignidadi di pesoa umanu y ta
rakonhise inviolabilidadi i inalienabilidadi di direitus umanu komu fundamentu
di tudu kumunidadi umanu, di pas y di justisa
2. Repúblika di Kabuverdi ta rakonhise
igualdadi di tudu sidadon dianti di lei, sen distrinsa di oríjen sosial ô
situason ikunómiku, rasa, séksu, relijion, konviksons pulítiku ô idiolójiku y
kondosns sosial; el ta garanti isersísiu interu di liberdadis fundamental pa
tudu sidadon.
3. Repúblika di Kabuverdi sta finkadu na
vontadi di popvu y el ten pa obijetivu fundamental realizason di demokrasia
ikunómiku, pulítiku, sosial, kultural y, inda, konstruson di un sosiedadi
livri, justu y solidáriu.
4. Repúblika di Kabuverdi ta kria,
prugresivamenti, kondisons indispensável pa kaba ku tudu obustaklu ki pode
inpidi dizenvolvimentu konplétu di pesoa
umanu y limita igualdadi di sidadãus y ses partisipason efetivu na organizason
pulítiku, ikunómiku, sosial y kultural di Stadu y di sosiedadi kabuverdianu.
Artigu 2º
( Stadu di Direitu Demokrátiku)
1. Repúblika di
Kabuverdi ta organiza en Stadu di
direitu demokrátiku, ku pé finkadu na prinsípius di soberania popular, na
pluralismu di spreson y di organizason pulítiku y demokrátiku, na ruspetu pa
direitus y liberdadis fundamental.
2. Repúblika di
Kabuverdi ta rakonhise y ta ruspeta, na
organizason di puder pulítiku, naturéza unitáriu di Stadu, fórma republikanu di
guvérnu, demokrasia pluralista, separason y indipendénsia di puderis, siparason
entri Igreja y Stadu, indipendénsia di tribunais, izisténsia y autonomia di
puder lokal y disentralizason
demokrátiku di Adiministrason Públiku.
( Soberania y konstitusionalidadi)
1. Soberania ta
pertense povu, ki ta izerse-l pa fórmas y na manera ki sta previstu na
Konstituison.
2. Stadu ta dipende
di Konstituison, el ta fundamenta na
legalidadi demokrátiku, el debe ruspeta y fase tudu pa leis ruspetadu.
3. Leis y tudu atu di
Stadu, di puder lokal y di tudu entidadi públiku, en jeral, sô ta ser válidu si
es sta di akordu ku Konstituison.
Artigu 4º
( Izersísiu di puder pulítiku)
1. Povu ta izerse
puder pulítiku através di referendu, di sufrájiu y tudu kes otu fórma
konstitusionalmenti stabilisidu.
2. Titularis di órgãus di puder pulítiku ta
dizignadu pa sufrájiu; es pode ser
dizignadu, tanbe, pa raprizentantis di povu ô pa fórma konstitusional
legalmenti stabilisidu.
Artigu 5º
(Sidadania)
1. É sidadon
kabuverdianu tudu kenha ki, pa lei ô pa konvenson internasional, ta goza di es
direitu.
2. Stadu pode asina
tratadus ki ta rakonhise duplu sidadania.
3. Kabuverdianus pode adikiri nasionalidadi di un
otu país sen perde si nasionalidadi di oríjen.
4. Lei ta regula akizison, pérda y reakizison di
nasionalidadi, komu inda si rejistu y
próva.
Artigu 6º
(Tiritóriu)
1.
Tiritóriu di Repúblika di Kabuverdi é formadu pa:
a)
Ilhas
di Santanton, S.Visenti, Santa Luzia, S.Nikolau, Sal, Boavista, Maiu, Santiagu,
Fogu, Brava y pa alguns Djeu ki,
storikamenti, ta fase parti di arkipélagu di Kabuverdi;
b)
Agu
di intirior, agu arkipelájiku y mar teritorial difinidus pa lei, komu inda
ruspetivus leitu y subsólus;
c)
Spasus
aériu ki ta fika pa riba di spasus jeográfiku refiridus na alínias antirior.
2. Na
si zóna kontigu (pegadu ku el), na zóna ikonómiku skluzivu di tiritóriu y na
platafórma kontinental, difinidus na lei, Stadu di Kabuverdi ten direitu di
soberania na matéria di konservason, splorason y aproveitamentu di rekursus
natural, vivus ô nãu vivus, y el ta izersi jurisdison en konformidadi ku
direitu intérnu y ku nórmas di direitu internasional.
3.
Ninhun parti di tiritóriu nasional ô di direitus di soberania ki Stadu ta
izersi sobri es mesmu tiritóriu pode ser alienadu pa Stadu.
Artigu 7º
(Taréfas di Stadu)
Taréfas fundamental
di Stadu:
a)
Difende
indipendénsia, garanti unidadi, prezerva, valoriza y promove identidadi di
nasãu kabuverdianu, y favorese kriason di kondisons sosial, kulturais,
ikunómikus y pulítikus nisisáriu.
b)
Garanti
ruspetu pa direitus umanu y sugura plénu izersísiu di direitus y liberdadis
fundamental pa tudu sidadon;
c)
Garanti
ruspetu pa fórma republikanu di guvérnu y pa prinsípius di Stadu di Direitu
Demokrátiku;
d)
Garanti
demokrasia pulítiku y partisipason demokrátiku di sidadãus na organizason di
puder pulítiku y na tudu kes otu aspétu di vida pulítiku y sosial nasional;
e)
Promove
ben-star y kualidadi di vida di povu kabuverdianu, partikularmenti di kes más
póbri, y konbate, prugresivamenti, prubémas di naturéza ikunómiku, sosial,
kultural y pulítiku ki ta inpidi un real igualdadi di oportunidadis entri
sidadãus, spesialmenti kes kauzas di diskriminason di mudjer na família y na sosiedadi;
f)
Promove
solidariedadi sosial, organizasãu autónomu di sosiedadi sivil, méritu,
inisiativa y kriatividadi individual;
g) Apoia Kumunidadi Kabuverdianu
spadjadu na mundu y promove na meiu di es prezervason
y dizenvolvimentu di kultura kabuverdianu;
h) Fomenta y promove idukason,
invistigason sientífiku y teknolójiku, kunhisimentu y utilizason
di teknolojias nobu, y inda dizenvolvimentu kultural di sosiedadi kabuverdianu;
i)
Prezerva, valoriza y promove língua matérnu y kultura kabuverdianu;
j)
Kria, prugresivamenti, kondisons nisisáriu pa transformason y modernizason
di
struturas
ikunómiku y sosial di manera a bira ifetivu direitus ikunómiku, sosial y
kultural di
sidadãus;
k) Proteje paizájen,
naturéza, rakursus natural y meiu anbienti, komu inda patrimóniu
stóriku-kultural y artístiku nasional;
l) Garanti pa stranjerus ki ta vive permanenti ô
transitoriamenti en Kabuverdi, ô ki sta en
tránsitu na tiritóriu nasional, un tratamentu konpatível ku nórmas
internasional relasionadu ku direitus umanu y
izersísiu di direitus ki ka sta konstitusional ô legalmenti
rezervadus a sidadãus kabuverdianu.
A rtigu 8º
(Sínbulus nasional)
1)
Bandera,
Inu y Armas Nasional é sínbulus di Repúblika di Kabuverdi y di soberania
nasional.
2)
Bandera
Nasional é konstituídu pa sinku
retángulu dispostu na sentidu di konprimrentu, un pa riba di otu (sobripostu).
a) Retángulu supirior y infirior ten kor azul, kel
supirior ta okupa un superfisi igual a metadi di Bandera y infirior ta okupa un
kuartu;
b) Pa sipara kes dôs retángulu azul, ta izisti três
faixa, kada un ku un superfisi igual a un duodésimu di ária di Bandera;
c) Faixas pegadu (adjacentes) ku retángulus azul ten kor branku y kel ki ta fika entri kes dôs
faixa branku ten di kor burmedju;
d) Pa riba di kes sinku retángulu, dés stréla amarélu di
sinku pónta, ku vértisi supirior na puzison di novénta grau, ta forma un
sírkulu ku séntru situadu na interseson di mediana di sugundu kuartu vertikal
(di bandera) kontadu di skérda, ku mediana di sugundu kuartu orizontal, kontadu
di parti di baxu. Stréla más pértu di es
bordu sta inskritu na un sirkunferénsia invizível y ki si séntru ta fika
pa riba di mediana di faixa azul infirior. (verificar)
3. Inu Nasional ten nómi di Kántiku di
Liberdadi y si létra y múzika ta ben publikadu y aneksadu na
prezenti Konstituison y es ta fase parti integranti di el.
4. Armas di Repúblika di Kabuverdi ta
rafliti un konpozison “radial” ki ta aprizenta, di séntru pa perifeia,
sigintis ilimentu:
a) Un retángulu ekuiláteru di kor azul y pa
riba di el ta ben un “facho” di kor branku;
b) Un sirkunferénsia ta limita spasu undi sta
inskritu, di ángulu skerdu ti ángulu direitu di triángulu, palavras “REPÚBLIKA
DI KABUVERDI”;
c) Três linhas di kor azul, en paralélu ku
bazi di trángulu, es é limitadu pa purmeru sirkunferénsia;
d) Un sugundu sirkonferénsia;
e) Un prumu di kor amarélu, alinhadu ku
vértisi di triángulu ekiláteru, kolokadu riba di kes dôs sirkunferénsia na
parti supirior;
f) Três argóla di kor amarélu ta okupa bazi
di sirkunferénsia, ku dôs ramu di palmera di kor verdi y dés stréla amarélu ku
sinku pónta y kolokadus simetrikamenti na dôs grupu di sinku.
Artigu 9º
(Línguas Ofisial)
1.
Purtugês
é língua ofisial.
2.
Stadu
ta promove kondisons pa ofisializason di língua matérnu kabuverdianu,
onbru-onbru ku purtugês.
3.
Tudu
sidadãu nasional ten dever di konxe línguas ofisial y direitu di uza-s.
Artigu 10º
(Kapital di Repúblika)
1.
Kapital di Repúblika di Kabuverdi é Sidadi di
Praia, na ilha di Santiagu.
2.
Kapital
di Repúblika ta goza di statutu adiministrativu spesial, di akordu ku lei.
TITLU II
RELASONS INTERNASIONAL Y DIREITU
INTERNASIONAL
Artigu 11º
(Relasons Intewrnasional)
1.
Stadu
di Kabuverdi ta sigi, na relasons internasional, prinsípius di indipendénsia
nasional, di ruspetu pa direitus
internasional y pa direitus umanu, di igualdadi entri Stadus, di nãu injerénsia
na asuntus intérnu di otus Stadu, di
rasiprosidadi di vantájens, di koperason ku tudu otus povu y di ko-izisténsia pasífiku.
2.
Stadu di Kabuverdi ta difende direitu di autonomizason y di indipendénsia di tudu
povu, el ta apoia luta di tudu povu kóntra kualker fórma di dominason ô di opreson
pulítiku ô militar y el ta partisipa na konbati internasional kóntra terorismu
y kriminalidadi organizadu transnasional.
3.
Stadu
di Kabuverdi ta difende abolison di tudu fórma di duminason, opreson y
agreson, dizarmamentu y soluson pasífiku di konflitus, y inda kriason
di un ónden internasional justu y kapás di garanti pas y amizadi entri tudu
povu.
4.
Stadu di Kabuverdi ta rakuza instalason di
bazis militar stranjerus na si tiritóriu.
5.
Stadu
di Kabuverdi ta presta pa Organizason Internasional, numiadamenti Organizasons
di Nasons Unidu y Unidadi Afrikanu, kolaborason nisisáriu pa rezoluson pasífiku
di konflitus y pa garanti pas y justisa internasionais, y inda ruspetu pa
direitus umanu, pa liberdadis fundamental y el ta apôia tudu sforsu di
komunidadi internasional ki ta prokura garanti ruspetu pa prinsípius konsagradu
na Karta di Nasons Unidu.
6. Stadu di Kabuverdi ta manti lasus spesial di amizadi y koperason ku paízis
di língua ofisial purtugês y ku paízis di akolhimentu di migrantis
kabuverdianu.
7. Stadu di Kabuverdi ta npenha na raforsu di identidadi, di
unidadi y di integrason afrikanu y fortalisimentu di asons di koperason pa
dizenvolvimentu, pa demokrasia, pa prugrésu y pa ben-star di tudu povu, pa
ruspetu pa direitus umanu, pa pas y justisa.
8. Stadu di Kabuverdi pode, pa realizason di un justisa internasional ki ta
promove ruspetu pa direitus umanu y di tudu povu, seta jurisdison di Tribunal
Penal Internasional, na kondisons di konplementaridadi y di otus
determinason konsagradu na Statutus di Roma.
Artigu
12º
(Akolhimentu di tratadus y akordus na órden jurídiku
intérnu)
1. Direitu internasional jeral ô kumun ta fase parti
integranti di órden jurídiku kabuverdianu.
2. Tratadus y akordus internasional ki aprovadu ô
ratifikadu konfórmi nórmas stabilisidu, ta vigora na órden jurídiku
kabuverdianu dipôs di si publikason na Bulitin Ofisial y di el komesa ta vigora na órden jurídiku
internasional y óki es ta vinkula, na
nível internasional, Stadu di Kabuverdi.
3. Atus jurídiku ki ta ben di órgãus konpitenti di organizasons supranasional, undi Kabuverdi sta
prezenti, es ta vigora diretamenti na órden júrídiku intérnu , désdi ki es atus jurídikus sta stabilisidu na
konvensons konstitutivu di tudu dôs
parti.
4. Nórmas y prinsípius di direitu internasional jeral ô
kumun, y di di direitu internasional konvensional, validamenti aprovadu ô ratifikadu,
ta ten prevalénsia, dipôs di si entrada en vigor na órden jurídiku internasional
intérnu, riba tudu kes otus atu lejislativus y normativus intérnu, ku valor
infrakonstitusional.
(
Adezon ô disvinkulason di di tratadus ô
akordus internasional)
- Adezon di Stadu
di Kabuverdi na kualker tratadu ô akordu internasional debe sta, antisipadamenti,
aprovadu pa órgãu konstitusionalmenti konpitenti pa kel efeitu.
- Vijénsia di
tratadus ô akordus internasional ta finda di kumun akordu, pa denúnsia ô “resésu”
(paralizason di órgãus konpitenti), renúnsia ô kualker otu kauza permitidu
internasionalmenti, ku exseson di
kadusidadi, ta sigi prosésu previstu pa si aprovason.
Arigu
14º
(
Akordus na fórma sinplifikadu)
Akordus na fórma sinplifikadu, ki ka meste
ratifikason, ta aprovadu pa Govérnu, mas
es ta trata apénas di matérias ki ta
fase parti di konpiténsia adiministrativu di
es órgãu.
PARTE
II
DIREITUS
Y DEVERIS FUNDAMENTAL
TÍTULU
I
Artigu
15º
(Rakonhisimentu
di inviolabilidadi di direitus, liberdadis y garantias)
- Stadu ta rakonhise
ma é inviolável direitus y liberdadis konsagradu na Konstituison y el ta
da garantia di si proteson.
- Tudu autoridadi
públiku ten dever di ruspeta y di garanti izersísiu livri di direitus y di
liberdadis y kunpri deveris
konstitusional ô legais.
Artigu
16º
(Rasponsabilidadi
di entidadis públiku)
- Stadu y otus
entidadi públiku é, sivilmenti, rasponsável pa asons ô omisons di si ajentis,
pratikadu na izersísiu di funsons
públiku ô trokadu es mésmus funson,
y ki di kualker fórma viola
direitus, liberdadis y garantias, ku prujuís pa titular di es direitus ô
pa otus algen (pa tirserus).
- Ajentis di Stadu
y di otus entidadi públiku é, di akordu ku lei, rasponsáveis kriminalmenti
y disiplinarmenti pa asons ô omisons
ki razulta di violason di direitus, liberdadis y garantias.
Artigu 17º
( Ánbitu y sentidu di direitus, liberdadis y
garantias)
- Leis ô
konvensons internasional pode konsagra direitus, liberdadis y garantias ki
ka sta previstu na Konstituison.
- Stenson y
konteúdu esensial di nórmas konstitusional relasionadu ku direitus,
liberdadis y garantias ka pode ser restrinjidu pa manera di interpretason.
- Nórmas
konstitusional y legal relasionadu ku direitus fundamental debe ser
interpretadu y integradu en armonia ku Diklarason Universal di Direitus
Umanu.
- Sô na kazus spresamenti previstu na
Konstituison lei pode restrinji direitus, liberdadis y garantias.
- Leis ki ta limita direitus, liberdadis y
garantias debe ten, obrigatoriamenti, un karáter jeral y abistratu, es ka
debe ten efetus retroativu, es ka pode diminui stenson y konteúdu esensial
di nórmas konstitusional y es debe limita na u-ki é nisisáriu pa
salvaguarda di otus direitu konstitusional protejidu.
Artigu 18º
(Forsa jurídiku)
Nórmas konstitusional
ralasionadu ku direitus, liberdadis y garantias ta vinkula tudu entidadi
públiku y privadu y es é diretamenti aplikável.
Artigu 19º
(Direitu di razisténsia)
Konstituison ta
rakonhise ma tudu sidadon ten direitu di ka obadise kualker órden ki ta ofende
si direitus, liberdadis y garantias y inda direitu di di razisti pa forsa kualker agreson
ilísitu, óki é ka pusível rakóre pa
autoridadi públiku.
Artigu 20º
(Tutéla di direitus liberdadis y garantias)
1. Pa tudu algen ta
rakonhisidu direitu di rakere pa
Tribunal Konstitusional, através di rakursu di “anparu”, tutéla di si
direitus, liberdadis y garantias fundamental, knstitusionalmenti rakonhisidus,
di akordu ku lei y ku obiservánsia di
nórma konsagradu na alínias siginti:
a)
Rakursu
di “anparu” uzadu kóntra atus ô omisons di puderis públiku y ki ta bai kóntra
direitus, liberdadis y garantias fundamental, dipôs di sta sgotadu tudu via di di rakursu ordináriu;
b)
Rakursu
di “anparu” pode ser rakeredu ku sinplis pitison, el ten karáter urjenti y si
prosesamentu debe sta baziadu na
prinsípiu di “sumaridadi”.
2. Pa tudu algen ta rakonhisidu direitu di
iziji, di akordu ku lei, indiminizason pa prujuís kauzadu na violason di direitus, liberdadis y
garantias.
