Omenájen pa Embaixadora Fátima Veiga

Atu di Justisa y di Maginanimidadi, Facebook di 7 di Seténbru di 2013 Oji, Kumunidadi Kabuverdianu di Boston y di Brocton ta omenâjia Sinhóra Embaixadora di Kabuverdi na Mérka, Dra. Fátima Veiga. Y kel-li dipôs di enkontro-konvíviu organizadu pa D. Rita, pa okazion di fésta di N. S. Da Graça, na Washongton, di omenájen realizadu na New Jerse y na Rhode Island. Rakonhisimentu pa óbra realizadu é sénpri un atu di Justisa, di Magnanimidadi y di Grandéza di Spritu. Obrigadu Kumunidadi Kabuverdianu pa nobréza di es jéstu, sen kor partidáriu ô konfesional. Parabens sinhóra Embaixadora pa meresimentu di es distinson. Mi tanbe, N foi konvidadu pa tistimunha es omenájen. Konpromisu antirior ku Júri diféza di Mestradu di Kriolístika y Língua Kabuverdianu, di ónti, dia seis di Seténbru, inpidi-m di sta prezenti. Prujétu kriolu obriga-m falta es “rendez-vous” di morabéza kriolu. Mas prezénsa di spritu pode ser más fórti ki prezénsa fíziku. Di Kabuverdi, y di tudu otu pontu di mapa undi família Veiga y Lima ta vive y ta labuta, ta bai nos mantenha y nos morabéza pa Kumunidadi Kabuverdianu na Mérka, spesialmenti pa organizadoris di es bunitu omenájen. Igualmenti, nos tudu y netinhuTiagu, en partikular, nu ta manda un téta rixu pa omenajiada. Nu ta spera ma Kabuverdi ta sabe valoriza es “dizenkontru na família”, pa “enkontru” ku Téra y ku língua ki ta uni-nu y ta identifika-nu na Nason Global, un enkontru ki sa ta ser simenti nobu, na un azágua kada bês más riku y más diversifikadu.