Na es Marsu 27, nha pensamentu di dia é mésmu kel-li: Lus, rakonhisimentu y Rekolhimentu.
Lus ki, sima un stréla brilhanti, ilumina y sa ta ilumina, manenti, luta di mudjer kabuverdianu na konkista, kada bês más signifikativu, di si direitus, di statutu ki el ta merese na família, na trabadju y na sosiedadi.
Lus, gó, tanbe, ki konduzi nhas pasu na txeu dizafiu di vida y ki fase di mi un ser ganhador na família, na sosiedadi, na formason, na trabadju y na azáguas di palavra.
Y si lus ilumina y sa ta ilumina luta ganhador di mudjeris di Kabuverdi; si lus ilumina y sa ta ilumina kada azágua di nha vida ki oji ganha más un stason, na un perkusu ki komesa desdi Marsu 27, di 1948, é razon más ki sufisienti pa nha profundu rakonhisimentu.
Fízikamenti interu y relativamenti saudável; sosial y kulturalmenti integradu y realizadu; familiarmenti ben akolhidu y amadu; profisionalmenti ajustadu y ekilibradu. Tudu kel-li ten un nómi: ekilíbriu y filisidadi relativu, pamodi na mundu, sima N prede na latin: “bonnum ex integra causa, malun ex quocunque defetctu”. Anton, nha rakonhisimentu é altu sima séu, é fundu sima mar, é largu sima mundu.
Obrigadu Nhordés, obrigadu tudu kenha ki koloka un pédra na kastélu ki mi ki fase, ki mi ki sa ta fase manenti, mas ku djuda di Nhordés y di nhos tudu.
Apezar di tudu, es anu ka ten selebrason pamodi, ku partida, pa otu dimenson, di nha mana Teresa, ténpu ta iziji inda algun rakolhimentu. Un rakolhimentu sen tristéza pamodi lei di naturéza ka pode sta tortu, nin mariadu. Aliás, na filozofia, N studa ma “natura nihil fecit frustra”.
Pa tudu krióla di nos téra, nha omenájen, nha stima y nha ruspetu.
