Raprizentason di Konjunson Kordenadu kopulativu "Y"

Debe kauza konfuzon pa alguns algen raprizentason di konjunson kordenadu kopulativu na kriolu. Uns ta raprizenta-l pa “i”, otus, sima mi, ta raprizenta-l pa “y”. Izénplu: mar y téra; N trabadja txeu y N odja frutu di nha trabadju.
Fundamentason ki nu tinha ti gósi éra pamodi “i” é un sinplis vogal; enkuantu “y” é un klasi gramatikal (konjunson... kordenadu kopulativu). Ses distinson ta fasilita kumunikason skritu.

N kaba di diskubri un nobu fudamentason, através di disertason di un aluna di Maiu y di mestradu di di Kriolístika, Ana Karina Tavres Moreira, ki ta raprizenta, na kriolu di Maiu, forma verbal “é” pa “i”: ”kasa di Manel i mas pikinin ku di Djon”/ a casa do Manuel é mais pequena que a do João”.

N konfirma es realizason ku un otu alunu di Maiu, na disiplina ki N ta ministra, "Traduson y Téknikas di Spreson na Kriolu".

Ta kontise ki si “i” pode ser un vogal y un fórma verbal; un tirseru funson di « i », komu konjunson kordenadu kopulativu, ta aumentaba konfuzon y sobripozison.

Di li razon pamodi N ta skrebe: “mar y téra” y nãu “mar i téra”.