PRÓPI SÁBI

 

Un bóka-l tardi própi sábi.

Kontise ónti, na kanbar di sol, un tradi kultural ku sbor di mel. Foi lansamentu di albun «ALMA», un konjuntu di puémas muzikadu di puéta-Prizidenti, JMN.

Na es tardi, N da kónta ma kazamentu di matrizis afrikanu y luzitanu di nos língua pari un mininu di oru predistinadu pa kanta mórna y pa skulpi poezia. Es mininu di oru é KRIOLU. Fórti dja bu grandi, fórti bo é dóxi, ó Língua di nha povu!

JMN, ku pirspikásia, ku sabedoria y sentimentu el skulpi, na Kriolu, puémas-konpozison ki dexa artistas muzikal babadu y adimiradu. ALMA é un infanti jeradu pa puéta JMN, batizadu pa artistas muzikal y plástiku, adimiradu pa tudu kenha ki toma parti na tardi kultural di ónti, rabésba di Nhu S. Valntin. 

Nhos obi un trexu di es albun-alma, na puéma IDENTIDADI :

“Kantu lumi rabenta / Na koxa di mar brabu / Santiagu labanta riba di agu / E bira ilha //

Kantu mundu di tudu mundu txiga / Simenti transa / Ómis ku mudjeris nasi / Na txon di ilha //

Mi é di li / Fidju di don di agu / Mi é di li  / Na es txon ki nasi riba mar / Pa nu podi skrebe un otu stória / Di paz y amizadi / Ku algen di tudu kor / Pamodi li tudu algen é algen”.

 

É un puéma-jénizi di nos kriolidadi, un kriolidadi abértu pa mundu, mas ku pé finkadu na txon di nos téra, undi ten  “algen di tudu kor / Pamodi tudu algen é algen”. Di es puéma ta imerje UMANISMU Y SOLIDARIEDADI PLANETÁRIU di nos KRIOLIDADI, un kriolidadi ki prende “rolá na mapa” di “téra-lonji” y di nos rinkon-natal, na rítimu di MÓRNA, na kalor di funaná, na amargura y na dosura di SODADADI. É pur isu ki ns identidadi é un “arku-da-bedja” (“arco-íris”)  di tudu kor y ku tudu amor.