Purgunta di Mario Semedo

Purgunta di Mario Semedo na Méza-Rodondu na Méza Rodondu di Brockton: (Maiu di 2012)

“É pusível ben ten un kriolu unifikadu undi tudu kabuverdianu ta seta-l y ku tudu si diversidadis?”(…)

Raspósta: Pode ben ten un ô dôs kriolu unifikadu na Kabuverdi. Tudu ta dipende di mobilidadi sosial, di kontributu di kriatividadi kultural y artístiku, di orientason di ensinu/invistigason, di partisipason di kumunikason sosial, di konsénsu linguístiku kriadu, na perspetiva Nórti/Nórti, Sul/Sul y, talvês tanbe, na perspetiva Nórti/Sul.

 Entritantu, oxi nu ka pode antisipa orientason di pulítika liguístiku y atitudis di utilizadoris di kriolu na futuru. Ta izisti dja un kazu di unifikason linguístiku na S.Visenti undi, a partir di variantis di Fogu, Santanton, S.Nikolau y Boavista, surji un varanti di konsénsu ki é popular na tudu zóna Nórti. Ku inportánsia di ilha di Santiagu y grandi mobilidadi ki oxi ta izisti en dison a el, pode ben konsolida un unifikason Sul-Sul ki dja sta en konstruson na es momentu. 

Kalker ki ben ser situason linguístiku na futuru, un kusa é sértu: diversidadi kultural y linguístiku é dja un konkista di nos povu.