Dia Nasional di Língua Matérnu

Dia 21 di Fevereu ta selebradu Dia Internasional di Línguas Matérnu. Nu meste un Dia Nasional pa selebra nos Língua Matérnu. Ten alguns alternativa: 

• Podeba ser un dia sima oxi, 24 di Setenbru, dia ki Purmeru Ministru di Kabuverdi, Dr. JMN, na 66º Asenbleia-Jeral di Nasons Unidu, realizadu na dia 24.09.2011, fase si diskursu na Língua Kabuverdianu, dianti un plateia formadu pa líderis di kumunidadi internasional. Oxi, algen pode ka da valor pa es akontisimentu. Manhan, jerason ki ta ben diskubri inportánsia di língua matérnu y tirsidjadura pa undi el pasa, ta ben rakonhise es momentu stóriku, pa Kabuverdi;

• Podeba ser dia ki aprovadu artigu 9º di Konstituison di 1999, undi, na pontu 3, fika konsagradu ma Stadu debe promove kondisons pa ofisializason di Língua Matérnu  Kabuverdianu, onbru-onbru ku Língua Purtugês;

• Podeba ser  31 di Dizénbru, dia ki na 1998 publikadu decrétu 67/98 ki aprova,  ku karáter sprimental, Alfabétu Unifikadu pa Skrita di Língua kabuverdianu;

•  Podeba ser 14 di Novénbru, data di publikason, na 2005, di Rezoluson 48/2005, ki aprova« Linhas  Stratéjiku pa Afirmason y Valorizason di Língua Kabuverdianu, undi fika stabilisidu ma «As instituições de ensinosuperior públicas e as escolas de formação de professores devem inccluir a disciplina de língua caboverdiana, de forma autónoma e ensinada como matéria». Ô, nton, klaúzula ki ta fla: «Na Administração, na comunicação social, na literatura, nas artes, bem como nos actos públicos e/ou oficiais, a utilização [da Língua Caboverdiana] é livre».

•   Podeba ser 16 di Marsu, dia ki institusionalizadu Alfabétu Kabuverdianu, através di Dekrétu-Lei nº8/2009.

N ta spera ma raprizentantis di povu, na algun momentu, ta diskubri inportánsia di nu ten un dia nasional pa nos Língua Matérnu y ta konsagra un data pa si selebrason.

Kel-li foi un manera ki N atxa pa rakorda purmeru aniversáriu di untilizason di Língua Kabuverdianu, pa purmeru bês, na ONU.