Téra di Rótxa y Mar, di Mórna y Sonhu

Alguns artista kabuverdianu, sima Ildo Lobo, diklara ma es “tinha ki nase na un téra di mar y di mórna”. Otus ta odja Kabuverdi sima un rótxa nu, formadu pa dés gransinhu di pédra, ta boia na mar, y ki so konsigi razisti, trokadu sonhu di kriolu, si kapasidadi di razisti, si rezilénsia.

Óra, si rótxa, mar y mórna ta konfigura jeografia y antropolojia di nos téra, si dizenvolvimentu y projeson ten ki sta, tanbe, ligadu ku kes elementus la y ku sonhu kriolu di transforma pédra na pérola, di lapida rótxa na diamanti.

Pa mar komesa, mas tanbe projeta u-ki Jorge Barbosa, na si puéma “Prelúdio”, el konsidera óra zéru di kriolidadi:

“Quando o descobridor chegou/ e saltou da proa do escaler varado na praia/ enterrando/ o pé na areia molhada/ e persignou/ receoso ainda e surpreso/ pensando n’El-Rei// nessa hora então/ nessa hora inicial/ começou a cumprir-se/ este destino ainda de todos nós”.

Na prinsípiu, mar foi prizon y simitériu di skravus y di fujitivus, dianti di kalamidadis na Baía Azul, mas tanbe el foi pórta di entrada di purmerus abitanti y, é mésmu puéta ki, na puéma “Panorama”, ta ratrata kosmogonia di téra undi el nase, di siginti fórma:

 “Destroços de que continente,/ de que cataclismos,/ de que sismos,/ de que mistérios?// Ilhas perdidas/ no meio do mar,/ esquecidas/ num canto do mundo/ - que as ondas embalam,/ maltratam,/ abraçam…// (…)

Praias/ onde naufragaram/ navios/ aonde aportaram/ caravelas,/ onde saltaram/ marinheiros queimados,/ corsários, escravos, aventureiros/ condenados, fidalgos, negreiros,/ donatários das Ilhas,/ Capitães-Mores…”.

Modi ki é posível fase, di un rótxa ta boia na mar, un pérola di referénsia na Áfrika, na kanpu di dizenvolvimentu, na izersísiu di demokrasia, na izénplu di bon governason? Segredu sta na kapasidadi di luta; na razisténsia dianti di adiversidadis y na sonhu kriolu di transforma pédra na pérola y pon; na transforma mar na un kaminhu y na fase di kultura y konhisimentu un alavanka pa nos dizenvolvimentu y pa globalizason di u-ki ta identifika-nu y ta distingi-nu.

Na Kabuverdi debeba labantadu un monumentu pa omenajia razisténsia di nos povu dianti di adiversidadis:

·         Na sistéma di skravatura el razisti y el konkista karta di alforia.

·         Na sistéma kolonial el razisti. Tirsidjadu y maltratadu, txeu móre na frenti di batalha, na Baia Azul y na téra lonji, mas Indipendénsia kontisi, simê.

·         Na ténpu di splorason, di opreson, di fómi, di séka y di stiájen, el razisti, y dizenvolvimentu dexa di dipende di kaprixus di dominadoris, di txuba ingratu y di mirájen di emigrason, tantu kel pa téras más pa Sul di Koninenti afrikanu, komu kel pa Mérka ô pa Európa, undi sonhu, txeu bes, ka ta pasaba di un fantazia.

·         Na rijimi di Partidu Úniku el razisti, y sistéma di demokrasia multi-partidáriu instaladu.

Otu aspétu di segredu baianu sta na sonhu kriolu di transforma pédra na pérola y na pon. Dja puéta Ovídio Martins ta flaba ma “kabras nxina-nu kume pédra…”, un métáfora pa signifika ma nos povu, dianti di adiversidadi, el prende rakria un nobu manera di vive, undi pédra pode ser lapidadu na diamanti ô, anton, transformadu na pon di sustentu.

Un otu segredu, inda, sta na kapasidadi di transforma mar na kaminhu, na un kaminhu di partida y di ragrésu (“si ka badu, ka ta biradu” – Nho Eujéniu Tavaris skrebe un dia). Si, na partida, nos povu ta lebaba si kultura, si forsa di trabadju, si seriedadi y sentidu di rasponsabilidadi, na ragrésu el ta trazeba más konhisimentu, más teknolójia y más sifron. Ta kontisi ki, óki si kultura mistura ku más konhisimentu, ku más teknolojia y ku más sifron, más dizenvolvimentu, tanbe, ta nase na txon di nos téra.

Pa kultura, Baia Azul projeta y sa ta projeta na mundu. Purmeru foi através di di emigrason y di literatura ki país komesa ta globaliza. Dipôs, foi bes di múzika y di arti. Cesária Évora foi enbaxadora baiana más konxedu na mundu. Na azas di mórna, el leba si téra pa mundu y el traze mundu pa si téra. Inspiradu na el, otus artista sa ta selebra un bunitu djunta-mô entri Baia Azul y aldeia global.

Apezar di tudu, nu ka sta satisfetu pamodi nos sonhu so séu ki é si limiti. Pur isu, kusas ten ki ba ta muda.

Ali Ben Ténpu sabe ma, u-ki nos povu é oji, é razultadu di si razisténsia, di si luta, di si kultura, di si sonhu… El sabe, inda, ma si é inportanti kaminhu ki dja el anda, pa frenti ten más kaminhu inda ki el debe anda pa Baia Azul pode bira na izénplu di komu un stória di sufrimentu pode ser transformadu na un kazu di susésu.

Ta flútua na si pensamentus, Ali Ben Ténpu komesa ta odja kusas ta muda:

·         Dja ki nos rikéza más grandi é rakursu umanu, pusta na konhisimentu bira un dizígniu nasional y un prugrama di vida pa famílias, pa puderis públiku y pa tudu organizason di sosiadadi sivil;

·         Na Skóla na família, na instituisons públiku y privadu, formason kultural, sientífiku y teknolójiku, bira spasus di exselénsia pa símia saber, pa kodje konhisimentu y pa selebra dizenvolvimentu;

·         Asésu pa saber, pa alén di ser un direitu, bira, tanbe, un dever;

·         Tudu algen ten kondisons pa studa, y ken ki ten talentu straordináriu el ta dadu, tanbe, kondisons straordináriu pa el invisti na el, na sertéza ki di es invistimentu, dipôs, ta ben ten ratornu multiplikadu pa país;

·         Enprendedorismu pasa ta fase párti di DNA di tudu baianu, pur issu, ku enpatia, tudu algen ta ta trabadja y kriatividadi, spritu inventivu, inovason konstanti ta bira un konpetitividadi saudável, na tudu frenti di dizenvolvimentu;

·         Géra, terorismu, inseguransa kaba; y nível di felisidadi ba ta subi, ba ta dizenvolve, ba ta sufistika;

·         Armundadi, solidariedadi, seriedadi, rasponsabilidadi, “accountability”, transparénsia, djustisa, pasa ta ser un atitudi y un vivénsia na Baia Azul y na aldeia global;

·         Rótxa ku montanhas transforma na un pérola, mar bira kaminhu y lóka di ikonomia azul;

·         Kultura y konhisimentu konverte na un alavanka pa dizenvolvimentu;

·         Arti y disportu okupa tudu spasu di lazer y konportamentus disvianti perde kanpu di atuason;

·         Kresimentu ikunómiku atinji persentájen di dos díjitus di PIB, y dizenvolvimentu umanu alkansa un nível invejável;

·         Paraízu na téra dexa di ser un iluzon y sufrimentu, fogadu, ba spanta la pa fundu di mar, sen ar pa raspira.

Ken ki ta kridita ma pode é pa ken ki kre (“where there’s a will, there’s a way”), ta kridita, tanbe, ma ka ten nada di májiku, nen di iluzóriu na premunisons di Ali Ben Ténpu.

Entritantu, ningen ka sta obrigadu kridita. Na verdadi, nu ka pode intende futuru so ku argumentus di un ténpu ki inda sta fóra di ténpu. Pur isu, Ali Ben Ténpu ka ta iziji, nin ka ta obriga ningen pa kúnfia na si palavras. Ken ki kre y ki diskubri razons pa kridita, sertamenti ka ta ben fika diziludidu. Ti la, nu ba ta lapida rótxa na diamanti, nu ba ta transforma mar na kaminhu y na ikonomia azul; nu ba ta kanta mórna y ta transforma trabadju, konhisimentu, kultura, arti, étika, sugurança y djustisa na alavanka di dizenvolvimentu.

In Profecias di Ali-Ben-Ténpu, SIMENTERA 8)