JORNADA TIRSIDJADU - 8º DIA

 

NOTI  DI  INSÓNIA

 

Na promontóriu inponenti, dianti di portu di Disgrasa, un dia, algun algen al lenbra di labanta un státua, ô un monumentu komemorativu – kapiton di nau y si konpanherus di viájen pensa.

Na verdadi, diskubérta di kaminhu di mar ki ta liga, pa purmeru bes, Promontóriu di Sagres ku Portu di Disgrasa éra un kusa ki debeba fika rajistadu na pájinas di stória y na memória koletivu, pa tudu ténpu.

Spadja Fé y omenta Inpériu éra kel purmeru obijetivu di aventura na mar ki ta ligaba Atlántiku-nórti di Baia di Rubera Grandi. Un sugundu grandi aventura staba na ligason di es Baia ku Portu di Disgrasa, na Kontinenti afrikanu, ku obijetivu nãu tantu di spadja Fé, mas sobritudu di duminason: na aspétu sosial, ikunómiku y pulítiku. Dja ki kel-li éra konsideradu un “obijetivu nóbri” inpostu pa puder de “Spada” y abensuadu pa lei di “Krus”, nau ka tinha medu nen di di fúria di tenpistadi, nen di raiba di Neptunu, diós di mar, nen mutu ménus inda di razisténsia di abitantis di Kukuli[1].

É si ki, nun noti di sésta-fera, na un altura ki Rubera Grandi staba kuazi dizértu y murgudjadu nun sukuru fitxadu, un karavéla botisadu ku nómi di Goltarpu[2], labanta féru y toma direson di Portu di Disgrasa. Pa tras fika mar di Baia, na un tristi silénsiu. Un dia es nau ta voltaba y, si na un purmeru momentu el ka konsigi traze oru ô prata, konsertéza ka ta faltaba forsa di trabadju ki baias sa ta mesteba, mas tanbe ki na alguns párti di mundu, konxedu ô inda pa konxi, sa ta mesteda. Es “forsa di trabadju” éra móda un mákina di fase dinheru, di kria rikéza. Asi, ka tinha nada ki podeba inpidi nau di leba si obijetivu pa dianti.

Ta disliza riba di mar, óra ku béntu favorável, óra na kóntra korenti, nau Goltarpu, dipôs di alguns noti kunpridu ki ka kreba manxe y di óras monótunu duranti dia, bafadu y pisadu sima xunbu, na meiu di un monti di difikuldadi, nau ta konsigiba vense distánsia ki ta separaba Baia di Rubera Grandi di otus téra más pa la.

Tripulantis di Goltarpu, kantu es diskubri monti más altu di kordilhera kukulensi, es xinti un grandi kontentamentu sima kel ki Nhu Diogu Gomes y Nhu Ntóni di Noli xinti, na kel pasadu dia un di Maiu di 1460, ki ka ta da pa skese.

“Téra dja parse, nos dianti!”, kapiton grita. Kes marinheru y tripulantis ki skorbutu ka ataka, nin ka móre na viájen, es bai pa diantera di nau pa, kontenti, es selebra kel grandi dia, na kanbar di sol, na meiu di nubris pisadu y tinjidu di burmedju, bu ta pensa m’éra un kriana ki sa ta fogaba na un mar di sangi.

Pa kes marinheru, entritantu, kel senáriu éra rei di bunitu. Kor burmedju karagadu ta sinbolizaba sakrifísiu ki Goltarpu konsinti pa el pode txiga na téras di Kúkuli, raferensiadu txeu, mas inda sen splorason.

Pa ses suguransa, éra midjór ki dizinbarki ser ku lus di dia. Éra prigozu ariska bai pa téra na un altura ki noti sa ta kaíba rápidu y Kúkuli staba murgudjadu nun sukuru fitxadu y na un silénsiu pisadu sima kel di simitériu.

Si kontentamentu ku diskubérta éra tamanhu, insertézas, tanbe éra txeu. U-ki es sabeba ka ta pasaba di fladu-fla.Téra podeba ser riku ô nãu; populason podeba ser kobardu ô rizistenti; kumunikason podeba ser faxi ô konplikadu; kasa di ómi podeba ser un divertimentu ô, anton, un konstranjimentu.

Tudu es interogason leba marinherus xinti, na kel noti ki ka kreba manxe, sabura y preokupason, tudu musturadu. Entritantu, kapiton di barku, ta pensa so na monumentutu ki ta labantada pa distingi si nómi, e ka konsigi prega odju kel noti interu. Kes otu marinheru, uns ku anbison ségu di manda, otus ku ganánsia di bira riku rapidamenti, otus inda ku medu di kastigu di distinu, ses noti, tanbe, foi di insónia y di indijiston.

---

[1] Metáfora di Áfrika.  Di mésmu fórma, “kukulensis” ta ser metáfora di afrikanus.

[2] Anagrama di Purtugal.