NHA ORASON

Orason ka ta publisitadu, pur isu, ka nhos lé. Nhos rakodje na silénsiu di un lugar apropriadu y nhos rasa, tanbe, un orason, sima mi, ô midjór ki mi, si manifestason di divinu na nhos é más fórti, más grandi ki kel ki na mi manifesta.

 

Sédu, palmanhan, un trindadi natural – LUS, VERDADI, VIDA - liga-m ku trindadi divinu ki na Bíblia batizadu ku spreson di PAI, FIDJU, SPRITU SANTU.

Lojikamenti, trindadi divinu, insondável y abisolutu, ka ta kebe, ka pode kebe na nha ntendimentu umanu nikilétu.

 

Anton, LUS, VERDADI, VIDA ta sirbi-m di ponti pa N alkansa LADU di LA, undi bilida di nha odju ka ta konsigi nxerga tudu dretu, tudu perfetu.

 

Através di es ponti natural, nha orason ganha fórma y kontiúdu, nas es parmanhan di oji.

 

Si ka tenba LUS (di sol y di konhisimentu), N ka ta konsigiba odja; N ka ta konsigiba konxe; N ka ta konsigiba apresia y, trokadu tudu kel-la, N ka ta konsigiba AMA.

 

Obrigadu, LUS! Si AMOR é di ke sentimentu más nóbri ki ten, sen LUS, difisilmenti, el ta podeba izisti. Iternamenti mi é rekonhisidu pa LUS ki ta pirmiti-m lé mundu, nxerga realidadi, ama nha armun, ruspeta nha similhanti.

 

Pa konhisimentu di VERDADI N ta fika en pás y ekilíbriu ku tudu ki ta izisti na nha bera y lonji di mi. Ta kontise ki konhisimentu di realidadi y ekilíbriu entri tudu ki ta izisti ta fase di nos un ser livri. Y vive na liberdadi é é vive na felisidadi y na dignidadi. Anton, viva VERDADI, viva LIBERDADI, viva DIGNIDADI.

Na naturéza, un BEN ku valor más grandi ki ten é VIDA. Y si VIDA é más ki oru, más ki diamanti. El ka pode kunpradu, el ka pode ipotekadu, el ka pode tirsidjadu. Nu debe prezerva-l, akarinha-l, defende-l. Y ken ki, sima mi, ta posui-l ten obrigason di gardise NATURÉZA y di xinti iternamenti rakonhisidu.

 

Pa tudu kel-li, na es parmanhan di oji, banhadu pa LUS di sol y di VERDADI, premiadu pa don di VIDA, nha orason ta razumi na dos palavra: OBRIGADU, NATURÉZA!

 

Pandemia pode fase si kabalindadi, mas dja nu grandi, dja!

 

NHORDÉS ki é más grandi ki nos, através di Si óbra y mizerikórdia, nu ta konsigi konpo mundu y purifika NATURÉZA, pa nu fika lonji di COVID 19, lonji di violénsia, lonji di skluzon y di poluison anbienal.