PENSAMENTU 43

 

IMORTALIDADI: UN POSIBILIDADI

 

VIDA é un DON di Univérsu.  MÓRTI, el, é un  DIZAFIU, di es mésmu Univérsu pa midjór nu valoriza vida, pa midjór nu konxe kondison umanu.

Ku nasimentu, nu kustuma, kuazi sénpri, selebra VIDA.

Na  falisimentu, nu debeba, tanbe, sabe ma, ku kada minutu ki nu ganha na vida, ta ser un gazadju/prénda na Óra di Bai. Kel-li ta signifika ma nu kunpri nos MISON y ma nos VIDA ka foi un FRUSTASON.

 

Si kel-la kontise, ta sérba motivu  di nu selebra VIDA; ta sérba razon pa nu diskubri ma MÓRTI é un ATIVU, y nãu un sinplis PASIVU. Un ativu pa sosiedadi ki ta kontínua ta rega ku agu di nos labada y ta disfruta di simentera ki nu organiza y di azágua ki nu fase.

 

Y si nu atxa motivu pa kridita ma VIDA ku MÓRTI pode ser un ativu, anton bale péna selebra purmeru komu un DON ki, di grasa, nu rasebe; bale péna seta sugundu komu un DIZAFIU pa nu vive, kada bes midjór, ku rakolhimentu na suparason; ku sodadi di ken ki parti; ku intilijénsia di ka dexa es suparason transforma na un disgrasa, ô  nun sufrimentu sen ténpu-l kaba.

 

Si dja nu alkansa es entendimentu, é pamodi dja nu konprende ma  LEI DI NATURÉZA, nin si nu kre, nu ka ta konsigi finta-l tudu ténpu y tudu óra ki da-nu na gana.

KONDISON UMANU é kel-li.  Si nu seta-l, kontu ka ten, pamodi dja ka ta disdjâ. Si nu ka seta-l. Si nu rakuza-l é pamodi nu tene txeu kaminhu inda pa anda, pa fase di IMORTALIDADI un POSIBILIDADI.

Facebook di 17/06/2021