Na tudu párti di mundu, aspétus ralasionadu ku identidadi di un povu é di purmeru grandéza. Y kel-li pamodi un povu, sen si identidadi, é sima saku vaziu: el ka ta konsigi fika sakédu; é sima balai nborkadu: béntu ta leba-l pa undi el kre.
É tristi un povu ki ka ta valoriza si própi kabésa, si própi identidadi. El
ta atxa ma identidadi di otu algen ki é úniku “ramu di pega na el”, mésmu ki na
el e pode foga.
Na Kabuverdi, inda, ten txeu algen ta dispreza ô ta rabaxa língua di si téra,
língua ki el obi na bariga di si mãi, ki el mama na el, el brinka através di
el, el konkista kretxeu ku el, el sunha na el, el kumunika ku si mãi, ku si
manus y manas, ku si kolegas di brikadera y di trabadju na el.
Pamodi, nton, dispreza-l y
rabaxa-l ???!!!
Kenha ki sabe raspósta, pa dá, sen tuntunhi, sen baradji bóka.
Na verdadi, ken ki é amigu di si povu; ken ki ta stima si kabésa, ken ki ka
é nen alienadu, nen disgardisidu, ta ama, ta valoriza y ta luta pa valorizason
di si língua. Y kel-li é móda fase valorizason di si própi kabésa.
Dja N obi alguns méstri-ignoranti ta fla ma nu ta pâpia kriolu désdi ki nu
nase y, pur isu, ma nu ka meste prende y studu u-ki dja nu sabe.
Modi N al konvense un ignnoranti, sima kel-li?! Anton purtugês, fransês, inglês
ka ta studa ses língua pamodi es ta papia-l ô es ta ntende-l désdi ninhu di ses
mãi?!
Dizintilijénsia ten limiti. Nhos po juís na kabésa, nhos dexa di nosentésa!
Algen pode opta pa ka studa, nin pa ka dexa si fidju studa kriolu. É si
prubléma. Agó, kre inpidi, dizinkoraja, dispreza ô inkrimina ken ki kre
valoriza si própi kabésa é ka apénas falta di étika, é falta di juís, di
“prénda” na kabésa. Nhos toma kuidadu, gó, pa manduxu ku erbakória ka toma-nhos
kónta di kural.
Manuel Veiga, 15/11/2021
Sem comentários:
Enviar um comentário