TXUBA MINGUADU

SIMENTERA DIVASTADU

 

Kantu, na Marsu di 2022, N publika Katikati pa Gran Bira Spiga, N fla nha mudjer ma el éra nha últimu livru publikadu.

 

El rabida pa mi, el fla-m: ka bu promete kusa ki bu ka ta pode kunpri.

 

Oji, dja N da kónta ma N pode ka kunpri promésa ki N fase. Na verdadi, skrebe, pa mi, é un fórma di raspira, di vive. Na skrita, N ta atxa raspóstas di nhas inkietason, N ta diskubri kaminhus pa alkansa métas ki N kre atinji.

 

Alguns familiaris y amigus dja fla-m ma N meste diskansa, ma N meste toma féria di skrita.

Nha própi néta, Luana, dja fla-m ma, un dia, el ta ben ku pédra y ku matxadu pa kebra, motxóku, nha konputador, nha instrumetu di skrita y, di es fórma, ténpu ta parse pa N brika ku el.

 

Ta kontise ki skrita ka ta kansa-m, el ta liberta-m. Kansadu N ta fika óki N sta paradu, sen nada-l fase. Kel-li é razon pamodi N pode ka kunpri promésa di para di skrebe y di publika.

Na es momentu, dja N sta na réta final di traduson di romansi Diário das Ilhas. Dja N disidi ma N ta pulika-l na nha Blog. Si, más tardi, algun entidadi atxa interesi na publika-l, na supórti papel, N ka ta opô.

 

Otu trabadju ki N ta ba ta publika na nha pájina di Facebook, y na nha blog, é: Txuba Minguadu / Simentera Divastadu.

 

Posivelmenti, N pode ben disidi publika-l, más tardi, na supórti papel. N sabe ma simenti di es azágua sa-ta kai na téra, séku toradu, y el pode bai para na bóku di korbu skanzeladu, runhu y nfadonhu.

 

Ke-li pa fla ma el é un azágua, talvês, fóra di si ténpu. Dja N pensa dizisti, mas nha sestu xintidu, di sidadon patrióta y ngajadu, ta sonpra-m sénpri na obidu: - mésmu ku txuba mminguadu y ku korbu ta nfada, ta tra lugar so manenti, azágua, nin si é minguadu, el pode garanti algun pon di susténtu, algun simenti pa otu azágua, la más pa frénti.

 

Asi, nha teimozia di oji, manhan, provavelmenti, el pode ben rakonhisidu komu un izersísiu patriótiku di sidadania. Si kel-la kontise, ta signifika ma simenti ki lavrador, speransadu, símia, mésmu ki el kai na pedregal, ku txuba minguadu y korbu nfadonhu y divastador, el pode razulta nalgun gran di midju, mésmu óki é más nbátxi ki spiga ku gran korénti; asi, pode fika garantidu tradison di otu azágua, la más pa dianti, ku txuba korénti y sen bitxu runhu pa divasta sforsu di lavrador.

1 de Setenbru di 2022

 

 

 

Kantu, na Marsu di 2022, N publika Katikati pa Gran Bira Spiga, N fla nha mudjer ma el éra nha últimu livru publikadu. 

El rabida pa mi, el fla-m: ka bu promete kusa ki bu ka ta pode kunpri.

Oji, dja N da kónta ma N pode ka kunpri promésa ki N fase. Na verdadi, skrebe, pa mi, é un fórma di raspira, di vive. Na skrita, N ta atxa raspóstas di nhas inkietason, N ta diskubri kaminhus pa alkansa métas ki N kre atinji.

Alguns familiaris y amigus dja fla-m ma N meste diskansa, ma N meste toma féria di skrita.

Nha própi néta, Luana, dja fla-m ma, un dia, el ta ben ku pédra y ku matxadu pa kebra, motxóku, nha konputador, nha instrumetu di skrita y, di es fórma, ténpu ta parse pa N brika ku el.

Ta kontise ki skrita ka ta kansa-m, el ta liberta-m. Kansadu N ta fika óki N sta paradu, sen nada-l fase. Kel-li é razon pamodi N pode ka kunpri promésa di para di skrebe y di publika.

Na es momentu, dja N sta na réta final di traduson di romansi Diário das Ilhas. Dja N disidi ma N ta pulika-l na nha Blog Odju d’Agu Bogspot.com. Si, más tardi, algun entidadi atxa interesi na publika-l, na supórti papel, N ka ta opô.

Otu trabadju ki N ta ba ta publika na nha pájina di Facebook, y na nha blog, é: Simentera ku Txuba Skasu y Korbu Nfadonhu.

Posivelmenti, N pode ben disidi publika-l, más tardi. N sabe ma simenti di es azágua sa-ta kai na téra, séku toradu, y el pode bai para na bóku di korbu skanzeladu,  malagoriadu y nfadonhu.

 Ke-li pa fla ma el é un azágua, talvês, fóra di si ténpu. Dja N pensa dizisti, mas nha sestu xintidu, di sidadon patrióta y ngajadu, ta sonpra-m sénpri na obidu: - mému ku txuba skasu y ku korbu nfadonhu, ta tra lugar so manenti, azágua, nin si é minguadu, el pode garanti algun pon di susténtu,  algn simenti pa otu azágua la más pa frénti.

Asi, nha teimozia di oji, manhan, provavelmenti, el pode ben rakonhisidu komu un izersísiu patriótiku di sidadania. Si kel-la kontise, ta signifika ma simenti ki lavrador, speransadu, símia, mésmu ki el kai na pedregal, ku txuba skasu y korbu nfadonhu, pode razulta nalgun spiga di midju; pode garanti tradison di otu simentera, la más pa dianti,  ku txuba korénti y sen bitxu runhu pa divasta sforsu di lavrador.