ARTI DI FINTA DISTINU

 

Na Kabuverdi, kuazi tudu é dizafiu. Si nu ka prende arti di finta distinu, en ves di nu vive, nu ta rigridi.

Kuandu na 1980, Dra. Luisa Ribeira konvida-m pa ministra aula di Kriolu, na Kursu di Formason di Profesoris di Ensinu Sekundáriu, kondisons ka staba reunidu, mas N seta dizafiu y N konsigi finta distinu. Na altura N tinha apénas un lisentiatura  di Linguístika Jeral Aplikadu y speriénsi di ensinu di fransês na Siklu Preparatóriu.

Ka tinha material didátiku, mas mi ku nhas alunu, nu fabrika material didátiku a-partir di rakódja y análi di tradison oral, di letras di múzika y di alguns testu na kriolu, di nos skritoris.

Na Institutu Supirior di Edukason, undi N foi profesor di kriolu, y na Uni-CV undi N foi kordenador di Mestradu di Kriolístika y Língua Kabuverdianu, situason di falta di material didátiku kontinua, mas ku arti di finta distinu, razultadus foi sénpri puzitivu.

Si mi N finta distinu y oji ta rakonhisidu ma N ten un ativu di spiriénsia na kanpu di ensinu, di diféza y di valorizason di língua kabuverdianu,  é pamodi N prende finta distinu. N prende ser professor-investigador ki sabe partilha y sabe prende ku nhas própi alunus.

N ta kridita ma profesoris ki na 10º  Anu di Skolaridadi ta bai ensinu kriolu, apezar di kondisons ka sta tudu reunidu, es ta konsigi finta distinu, y razultadu ta ben ser pozitivu.

N kre fla ma majistériu di kriolu, mésmu na falta di material didátiku, obriga-m produzi óbras ki, oji, pode sirbi di material didátiku:

Diskrison Strutural di Língua Kabuverdianu; romasis Odju d’Agu y Jornada Sen Ratornu; A Construção do Bilinguismo; O Crioulo de Cabo Verde – Introdução à Gramática; Dicionário Bilingue Crioulo Português; Le Créole du Cap-Vert: Étude Grammaticale Descriptive et Contrastive; Formação do Crioulo – Matrizes Originárias; Profecias do Ali-Ben-Ténpu; O Caboverdiano em 45 Lições, Katikati pa Gran Bira Spiga.

Si na 1980 N rakuzaba konviti di Dra. Luisa Ribeiro ku pretestu ma kondisons ka staba reunidu, N  podeba ka tinha, oji, kapital di spiriénsia ki N ten y óbras ki, dipariba, N prizenta, y ki pode apoia na majistériu di Kriolu, podeba ka izisti.

Post di 20/10/2022

Manuel Veiga