NATAL 2022

 

NATAL REMEDIADU

ANU NOBU ABESUADU

 

Sábi ku kasábi «brutxidu» karapatidu na kunpanheru.

N sta sábi y gardisidu di: vive na nha Téra, «garotxadu», brasadu na nha língua,  na nha kultura, na tradison di nha Gentis Grandi, na pás y stabilidadi, simentera y kodjéta di nha povu, ku spritu abértu pa tudu konkista di umanidadi.
N sta kasábi ku klima di violénsia y kriminalidadi ki, na alguns pontu di nha Téra, dja toma txada pa pónta.
N sta kasábi ku tudu kenha ki ten difikuldadi di atxa un pon pa susténtu, un kaza pa mora, un skóla pa studa, un sirbisu di saúdi pa kuid di kabésa..

N sta kasábi, inda, ku atitudi béliku di alguns país, na mundu; ku pulítika di poluison ô di distruison di naturéza; ku tráfiku di dróga y di algen; ku korupson ikonómiku, étiku y moral; ku injustisa na propi justisa; ku stremismus di tudu kasta, na nómi di pulítika ô di krénsas ratrógadu.

N sta speransadu ma 2023 ta ser un anu ku más diálogu; ku más pás, ku más justisa sosial; ku más saúdi, ku más pon, ku más lar ku dignidadi y armonia; más ruspetu pa tudu algen, na kanpu y na sidadi.

Si kel-li kontise, nu ta ten un 2023 NHAKU, BODÓNA Y FADJADU.

 

Pa tudu nhos, BOAS-FÉSTA y un 2023 ku PÁS, ku ARMONIA y PRUGRÉSU, na tudu TXADA, na tudu RUBERA, na tudu RINKON, na tudu béku ku beléku, na tudu SIDADI di mundu interu.

MI É DODU NA NHOS, TUDU FÉPU! PAMODI? NHOS TUDU É NHA ARMUN: di sangi ô di kultura; di étika ô di kondison umanu; di «skatolojia» na Téra y na ladu di la.