NATAL KRIOLU

ANU NOBU MESTISU

 

Futuru di Umanidadi é mestisu

Natal di manhan, tanbe, é kriolu

Só ku névi di Nórti, el é friu «pa xuxú»

Só ku sol di Sul, el é kenti «pa frónta»

Midjór Natal é Nórti ku Sul, un n´otu, «gerotxadu»

 

Na Natal 2022 y Nobu Anu 2023

Kabuverdi sa-ta luta, manenti-manenti

Mundu sa-ta sufri, dia ku noti, unbês-bai

Ténpu di mudansa bira un azágua ku pok´ agu

Óra klarin, na orizonti, sta ku medu manifesta

 

Nton, dja txiga óra di fla dja txiga …

Dja txiga óra di odja Kabuverdi bistidu di Verdi

Dja txiga óra di odja mundu más Fratérnu/Solidáriu

Dja txiga óra di nos tudu ser aurmun, di verdadi

Kel-li é NHA VÓTU 2023, pa Mundu, pa nha Povu

 

Un Vótu di Speransa, ka di Dizuspéru

Sima kel di nos puéta, Anónio Nunes,

«… Ku barudju di mákinas ta trabadja

Ku agu ta kóre na labada y na rubera

Ku plantas ta frutxi-frutxi di txon

Ku bois na trapitxi ta pila kana

Ku txeru di mel, pónda-pónda y kenti

Ta alimenta sonhus y ta ranoba planus

Ku speransa fórti ta gorgolêtia na béntu

Ku sonhus nóbri ta fortifika spritu, ta jermina Vida !..».

 

Manuel Veiga

Dizénbru di 2022