JORNADA TIRSIDJADU - 4º DIA

 

PARTIDA

 

Skritor-vati tevi un noti rei di ajitadu. Purmeru, foi insónia, dipôs un longu pisadelu. El korda sufokadu y da-l gana di bai odja sol ta nase, mas la di riba di Piku-Ntóni.

Fórti bunitu! Fórti sertéza di tudu sta ton diferenti! Kes “sónbras pisadu” ki sa ta bafaba si alma na kel noti kunpridu dizaparse dianti di kel senáriu di un dia ton bunitu ki sa ta kababa di disponta. Anton, di fundu di si alma, e xinti un grandi alegria. Mundu, si própi mundu, ka podeba ser apénas un “prizon”, éra, tanbe, un speransa, y talvês mésmu un kau sábi pa mora.

Karisiadu pa un briza frésku di kel komésu di dia, murgudjadu na pensamentus profundu di otus ténpu, la pa tras, skritor-vati, sen da kónta, el komesa ta skrebe uns vérsus bunitu, pa frónta:

 

“Ami, N kre sérba sinplis naturalmente / sen obrigason di ser sinplis. // […] Di es manera, N ta sabeba sufri ku más kalma y ri ku más grasa / […] na nhas sonhus ka ta tinha kaminhus trankadu di otus téra la pa lonji. // Pa mi ta txigaba kel kaminhu kurtu ki ta trabesa mar di kanal / na un di nos barkinhu /  ku véla pa bai konxi ilha ki sta nos dianti. // N ka ta xintiba anbison di rikéza nin di grandéza.  // N ta konfortaba ku kusas pikinoti ki gentis póbri ta stima rei di txeu / […] Nha filisidadi ka ta nkomodaba ningen / na nha momentus difísil ka ta tinha nen kobadura nen blasfémia” (12).

 

Senáriu di sol ta nase fekunda na alma di skrito-vati es vérsus-simenti. Sinplisidadi ki el kre pa el é omésmu ki el kre pa si baias, linpu y sen manxa, partikularmenti na kel grandi parmanhan, transbordanti di lus y di puezia.

Pisadelu ki bafa-l na noti pasadu, y ki tantu nkomoda-l, da lugar  pa es senáriu rei di bunitu y kontajianti  ki el ka ta konsigi razisti tentason  di rajista tudu na si diáriu.

Vizon éra dos: ku odju, mas tanbe ku alma, na prezenti, mas tanbe na pasadu.  Un monti di imájens bira ta frutxi-frutxi, un tras di otu. Rápidu sima nos skritor-vati éra, el ka kansa di rajista, pa el y pa posteridadi, tudu sinal ki el sa ta kaptaba na si ekran orgániku, mas tanbe na ekran virtual.

Dimiradu, el sisti kel uma splozon di vulkon ki, kuerenti ku si própi kabésa, el bota pa fóra, d’un runpanti, dés furmós gazinhus di téra, tudu es fofinhu y di mésmu naturéza. Dja ki es éra tudu parsidu ku kunpanheru, es dadu un nómi so (baias) y dés burnómi (Santiagu, Fogu, Brava, Maiu, Boavista, Sal, S. Nikolau, Santa Luzia, S. Visenti, Santanton). Tudu es éra rei di bunitu, mas di un beléza natural y non inventadu.

Na purmeru baia nu ta atxa Piku-Ntóni, ku tudu si bazofaria, ta dumina un senáriu di ruberas, kutélus y un monti di txada, pa tudu banda ki nu bai, pa tudu ladu ki nu volta. Kustuma ta fladu ma el é seleiru di tudu kes otu, na anu di bon azágua y, na kel-li, tudu kes otu baia ta konkorda. Aliás, é n’el ki purmeru simenti di kabuverdianidadi lansadu y brota di téra.

 Mas, ligadu ku kiston di enkantamentu, ka ta fika pa tras baia di vulkon más tamanhu, ku si famozuzu Txan di Kalderas y si kafé ki dja ganha fama, apresiadu déntu y fóra di téra.

Otu baia ki ka kre fika pa tras é kel undi mórnas di Nhu Eujéniu konkista kurason di tudu baianu, dja ki el ta raprizenta nos alma y nos kultura más profundu.

Un otu baia é kel di gentis sinplis y dretu sima ponbas y ki é grandi fornisedor di sal pa ténpra. Inda ten baia di dunas y di divinal Praia di Santa Mónika, ku si grandi potensial pa dizenvolvimentu turístiku.

Falta rifiri, inda, baia di Santa Maria, ku si areia finu, ku nómi ki el erda di Nha Vírjen Maria, kel ki na si bariga y ku amor di mãi, el ta rasebe kenha ki ta txiga y el ta sana ku lénsu branku kenha ki ta parti pa lonji.

 Nu ka pode skese di baia di “Simináriu” ki abri-nu odju nun époka ki txeu algen tinha el fitxadu.

Y kel baia ki é ka di ningen pamodi é rezerva natural di nos tudu y ki di el, un dia, nos tudu pode ben benefísia di si rikéza sukundidu inda.

 Ten tanbe baia di Portu Grandi ki liga-nu ku mundu, ki leba nos mundu pa mundu y traze otus mundu pa nos mundu, na un diálogu kada bes más fekundu, más armoniozu y más ruspetador.

Falta-nu inda pâpia di baia di ruberas profundu y di montanhas di rótxa uís, ki ta inpresiona tudu kenha ki bai pa la, trokadu fama di si grógu y pur kauza, inda, di si amor pa agrikultura, u-ki ka ta pirmiti-l dexa ninhun palmu di téra birsi, sen ser kultivadu, mésmu na enkóstas di rótxa runhu.

Skritor-vati, dianti di tudu es senáriu, el xinti un alegria, sen igual, ta inunda-l si spritu, el xinti obrigadu kanta-l y, sobritudu, ama-l.

- Mi, N ta ama …

N ta ama-u ku tudu forsa di nha alma, ó lavrador anónimu, korajozu y inkansável, di Rubera di Ngenhu, Boentrada, Matu Santxu, Txada Gomi, Rubon Manel, Txada Falkan, Libron, Fundura, Padjakarga, Suduguma …

Mi, N ta ama-u ku tudu forsa di nha alma, ó mudjer di balai na kabésa y fidju bonbudu, ku bo  un monti di bes nu tapa ku kunpanheru, sen sabe bo é kenha, kus’é ki staba na bu balai, pa undi bu sa ta baba ô bu sa ta voltaba y kenha éra pai di bu mininu bonbudu.

Mi, N ta ama-u, ó piakador di altu-mar, ki ta parti pa faina, sen sertéza di volta ku redi xeiu ô vaziu. Mi N ta ama-u, ó emigranti pa téra lonji ki pa tras ta dexa pai, mãi, spoza ô kretxeu, sen sertéza di un dia torna odja-s, es tudu.

 Fórti N ta ama-u txeu, ó Kabuverdi nha Téra, ó Kabuverdianu nha Povu!

Mi, N ta ama-u, ku tudu forsa di nha petu, ó fidju di Adon, mésmu sen konxe bu pai, mas sertamenti, na lei di Kristu, nos é armun…

 

Mi, más ki kanta somenti, N ta ama kontenti:

Rubera di Julion ku Montikara, si dianti;

Rubera di Tori, ku si vizinhansa;

Salinas y kantinas di baia di aeroportu;

Keju ku xasina, di baia di pastoris; 

Mórna ku morabéza, la di txon di dunas y di floris;

Kafé ku manekon, la di lavas di vulkon;

Batuku ku funaná, di bérsu di nha Bibinha;

Tanbarina y farinha di pó, la di banda di “rótxa skrebedu”.

Mas, si es tudu N ta ama, é pamodi…

Na kel-li, pensamentu di nos skritor-vati flútua, flútua y, di rapnti, el xinti ma el sa ta skrebeba un puéma:

 

“Di ramenti, el ben, N ka sabe splika / y el fika déntu di mi / ta purturba / kel pás ki N teneba /  na spritu y na alma”(11).

Skritor-vati tenta konsentra, mas si spritu sa ta vagiaba lonji y, na lugar di si baias komodadu, senáriu muda konpletamenti. Na verdadi, sima ki el staba na un filmi di fikson, el komesa ta nxerga:

“Montis skolégu ta inplora pa séu! (…) / na ses raviravólta paradu ki dja dura séklus, / ta sota gargalhadas pa osianus / ki fika na komésu, / ta fase bioku enigmátiku / sima ki es kre txoma atenson di un drama milenar (…) /  na praias daguma / (…) / undi algun naviu naufraga, / undi alguns karavéla kaba pa txiga / undi dizinbarka marinherus bronziadu pa sol, / undi txiga korsárius, skravus, aventurerus, / kondenadus, fidalgus, negrerus, / donatárius di ilhas, / Kapitons-Xéfi … “(14).

- Mas modi ki N pode ama ô odia tudu kel-li?

Não – konklui -, stória ka ta odiadu.

Kes si baias, ki el kre txeu, sima bilida di si odju, dja es pasaba pa mon di otus “donu”. Foi Infante D. Henrique ki manda diskubri-s. Lógu di sigida, Nhu Rei Afonso V foi informadu di es akontisimentu y el razolve entrega-s pa si armun D. Fernando pa providensia, dos anu dipôs, si povuamentu. Tudu jurisdison tenporal di baias staba na mon di D. Fernando, enkuantu rasponsabilidadi spiritual fika na mon di Órden di Kristu, ku obrigason di klérigus di es Instituison selebra, simanalmenti, na dia di sábadu, un misa pa alma di korajozu Infante D. Henrique.

Na komésu, povuamentu ka foi fásil. Prubléma ki ta labantada, na altura, éra: grandi distánsia entri Metrópoli y baias; insalubridadi di klima ki, sima ki ravoltadu, el ka ta purduaba ninhn aventureru forasteru ki razolve ben finka pé na txon di baias.

Trokadu tudu kel-li, aventurerus ta izijiba txeu fasilidadis pa baias ka permaneseba dizértu, u-ki ta daba razon pa Velho de Restelo ki na aventuras di Infante D. Henrique somenti el ta odjaba “glória di manda”, kubisa sen razon di ser, y fama, sen pé pa anda, di un póbri mortal ki éra Purtugal.

Apezar di tudu, pa karta di Nhu Rei di 12 di Junhu, di 1466, armadoris interesadu na na povuamentu y splorason di baias ta resebeba un monti di fasilidadis, sobritudu relasionadu ku kumérsiu na baias y na Kósta osidental di Kontinenti afrikanu, désdi Giné, ti txiga na Serra Leoa, ku exseson di protetoradu di Arguim (15).

Ku kumérsiu di skravus, di algudon y di kavalu, Vila de Rubera Grandi komesa ta dizenvolve.

Nhu Ntóni di Nóli volta pa Promontóriu di Sagris purmeru ki Nhu Diogu Gomi. Pur isu, komu rakonpénsa di diskubérta, el dadu Kapitania di Rubera Grandi pa el governa. Más tardi, Kapitania di Alkatrás ta fika na mon di Diogu Afonsu. Kel-li foi rakonpénsa pa diskubérta di baias ki es protagoniza.

Ku diskubridoris txiga, tanbe, kes purmerus raprizentanti di órden di Kristu. Na verdadi, “dilata inpériu” ta signifikaba, tanbe, “spadja Fé”. Kes dos misosn-li, éra sima dos armun jémiu. Pur isu, integradus na grupu ki Nhu Noli ben ku el, pa inísia povuamentu di baia, ben, tanbe, Fradi Rojériu ku Jaimi, tudu es natural di Katalunha y, antirirmenti, es ta rizidiba na Konvéntu di S. Bernardinu di Autogia (16) 

 

Fé ku Inpériu sénpri djuntu ku kunpanheru, na kel ténpu antigu di séklu XV, y na mison rei di patriótiku  di “leba mundu pa mundu”. Entritantu, namoru dis es dos forsa, óra dóxi, óra margós, éra un realidadi.

Na prinsípiu, fradi Rojériu, el foi imoladu, asasinanadu, mésmu, sima un kabritu, pa prepoténsia di un familiar di Nhu Noli, ki ta txomaba Bartolomeu, trokadu denúnsia di vida skandalozu y koronpidu di kel italianu, u-ki leba fradi Rojériu akonselha si amanti pa abandona kel vida  di pekadu.

Fradi Jaimi, el, e prendedu y el kaba pa libertadu trokadu medu ki italianu panha, dianti di amiasa di popularis. Di akordu ku stória, Frei Rojériu foi  purmeru misionáriu ki dirama si sangi na baia … apezar di si fé y di si kultura literária y muzikal (17).

“É sénpri si: Poder ten medu di intilijénsia, mas mi N ka sta li pa julga”.

Skritor-vati ratoma fiu di si diáriu na kel parmanhan di sol kenti, la di riba di Piku-Ntóni, el komesa ta rajista, di es bes e ka éra xigada, mas sin partida di Naus. Non un partida pa baia ki staba di otu ladu, si dianti, mas sin pa Kontinenti afrikanu, pa liga téras di Nórti ku kes di Sul, y baias diskubértu ta sirbiba di plaka jiratóriu na me di Atlantiku.

Entritantu, di rapenti, nubris nkubri sol y kabésa di monti undi skritor-vati staba. El ki bai odja sol ta nase, el kmesa ta odja, na si imajinason, nasimentu di  si baias di profundézas di mar iménsu y di  séntru Áfrika-mãi, dipôs di un gravidês difísil ki dura txeu séklu, mas mésmu si, mininu kaba pa nas.

Más-o-ménus purturbadu ku mudansa brusku di ténpu, nos skritor-vati disidi  rakupera inerjia, dja ki pa kel nobu viaji di nau el mesteba un razisténsia di asu y un pasiénsia di ilefanti. Pur isu, el organiza nótas ki el tinha tomadu y, divagar, el komesa ta dixi, la di riba di Piku-Ntóni, undi el bai odja sol ta nase.