FÉRU GAITA ANIVERSARIANTI

 

SELEBRASON BUNITU Y ORIJINAL

 

KONJUNTU FÉRU GAITA  selebra 25 anu di perkursu ku un jornada kultural bunitu y orijinal.

Ken ki, sima mi, tistimuna es jornada, na kualidadi  di konvidadu-omenajeadu, ku diretu na un troféu di rakonhisimentu, so pode gardise Féru Gaitu y si “menager” Gugas Veiga pa distinson y pa oportunidadi di sisti una tu komemorativu orijinal y  bunitu “pa frónta”.

 

Beléza y orijinalidadi di es atu sta na si formatu y konteúdu: spetaklu muzikal sublimi; distinson di tudu kenha ki koloka un pédra na es 25 anu di perkursu di Féru Gaita; parseria ku Komunidadi Katóliku di Txada S. Filipi, na konstruson di un Igreja y Séntru Parokial.

 

N ta kridita ma distinson ki N rasebe na kualidadi di antigu Ministru di Kultura, parseru di Konjuntu, é un distinson pa Stadu di Kabuverdi, dja ki tudu patrosíniu ki, pa nha intermédiu, Konjuntu rasebe, foi ku rakursu di Stadu ki staba na nha dispozison. Pur isu, nha gardisimentu é pesoal, mas tanbe é na nómi di Nason Kabuverdianu.

 

Na es selebrason, N fika partikularmenti sensibilizadu ku parseria stabelesedu ku Komunidadi Katóliku di Txada S. Filipi. Pastor di Igreja lokal, pensa ki Konjuntu podeba sta ben sirbidu, ekonómikamenti, ta nada na dinheru, el diriji pa el, ku pididu di djuda pa konstruson di un Igreja y di un Séntru Parokial.

Sen posibilidadi ekonómiku di satisfase es pididu, Féru Gaita disponibiliza un sértu nunbru di CDs pa vende, y montanti rakadadu ta sérba si kontributu.

 

N atxa es atitudi bunitu y orijinal. Kes tres CD, lisin dipaxu, ki N ilustra es nha post, N adikiri-s na fin di spetaklu komemorativu.

Obrigadu Féru Gaita pa distinson ki N rasebe y pa oportunidadi ki da-m pa solidariza ku Komunidadi Katóliku di Txada S. Filipi.

Parabéns pa 25 anu di karera y obrigadu pa trabadju incansável di promoson, diféza y valorizason di tradison muzikal kabuverdianu, FUNANÁ prinsipalmenti.

 

Manuel Veiga

18 di Setenbru di 2021