NHA SONHU / NHA VÓTU

Puéta António Nunes, alguns anu antis di Indipendénsia, el  “sunha ma es dés gransinhus di Téra, un dia, ta sérba di-nos”.

Na manhan di 5 di Julhu di 1975, mensájen di “Puéma di Manhan” ta bira, dimê-divéra, un realidadi.

Oji, 46 anu dipôs di es “dia klarin”, N da ku mi própi, na kurva di 2021, ta sunha ku un Kabuverdi diferenti.

 Firmimenti, N kre y N ta spéra:

Ma Unidadi, Solidariedadi, Patriotismu, Desénsia, Onestidadi ta fase párti di nos Bíblia izistensial, sima Amílcar Cabral kustumaba fla.

Ma Téra ta dizenvolve amoniozamenti, ku prugrésu y kualidadi di vida, na tudu txada ku rubera; ku nível sanitáriu y edukativu di exselénsia; ku enprégu pa tudu algen ki kre ô ki meste trabadja; ku txuba korenti y azágua fadjadu; ku abitason kondignu pa tudu família; ku dizenvolvimentu sosial, kultural y ekonómiku abranjenti y di kualidadi.

 

Ma nos LÍNGUA, nos STÓRIA y nos  KULTURA ta fase párti di prugramas di ensinu y ma KRIOLU KABUVERDIANU, nos língua matérnu, ta alkansa, “de jure”, statutu di língua ko-ofisial ki, “de facto”, el ta goza.

 

Ma DEMOKRASIA ta ser interpretadu, vivedu y izersidu na si propriedadi, esénsia y oríjen semántiku, sen diturpason, sen malabarismu, sen “abilidadi di txiku-spertismu”, ku transparénsia, onestidadi, rasponsabilidadi y universalidadi.

 

Ma GOVERNANTIS ta ser un fiel servidor di Nason; ma tudu  sidadon ta kunpri si dever di sidadania; ma instituisons di prestason di sirbisu ta funsiona, ku efisiénsia y efikásia.

 

Ma KABUVERDI ta ser di nos tudu, y nãu di uns poku, parazita, ki kre vive di trabadju y sforsu alheiu.

 

Pulítikus, Govérnu y kandidatus pa Majistratura Suprému ki konvense-m ma, na ses nível, es ta trabadja pa konverte nha sonhu na un realidadi, es ta konsigi, tanbe, mobiliza-m pa vota na ses prugrama eleitoral. Di otu fórma, “es pode tra ses kabalinhu di txuba”, pa ka tisga na frésa ô dizidrata y “panha ka pode”, na kalor.

Manuel Veiga

18 diSeténbru di 2021