Amílcar CABRAL:

 

Un LUS na NOTI d’ÁFRIKA

 

Mos!

Abo, sima bo

So bo!

Bu djobe, bu odja

Bu ozerba, bu xinti

Bu prende, bu inxina

Bu disidi, bu fase

Bu txoma, bu sigidu

Bu luta, bu ganha

Bu móre, bu inkarna:

Na kada pioneru

Na kada kriansa

Na kada ómi ku mudjer

Na tudu fidju di nos téra.

Sima bo, so bo!

(kf. MV, Odju d’Agu (2019:43-44)

Un Téra ku un Ómi sima A. Cabral, el ka é apénas un Grandi País, el é un NASON ABENSUADU : pa atitudi vizionáriu; pa bai ku ben, ta prokura libertason di  povu; pa simentera, en-pó, di demokrasia; pa skóla di patriotismu; pa kultura literáriu, artístiku y antropolójiku; pa promoson di dizenvolvimentu umanu inkluzivu y universal; pa sonhu di “un otu TÉRA na própi téra”; pa dizeju ardenti di liberta Áfrika y di umaniza mundu.

Obrigdu, Giné y Kabuverdi; obrgadu D. Iva Pinhel y Prof. Juvenal Cabral, pa es ser “prodíjiu”, studanti brilhanti, “soldadu di pás”, konbatenti pa LIBERDADI, diplomata dialoganti, puéta y filózofu engajadu, afrikanu asumidu, umanista sen frontera.

“Saravá” família di A. Cabral pa jenerozidadi di enrikise Áfrika y Mundu ku un ton ilustri konpatrióta.