INU DI NOS IDENTIDADI.

DJA TXIGA MARÉ DI NOS TUDU VALORIZA-L

Nu nase, nu obi-l purmeru di bóka di nos mãi.

Nu kria ku el, nu brinka na el, y na azágua, partikularmenti na kanpu, nu kruza sénpri ku el.

Na skóla y na adiministrason, gó, el ka dexadu entra, nin pa fla mantenha.

Entritantu, el ranoba y el bonina na batuku ku finason, na mórna ku koladera, ku Nha Bibinha Kabral, ku Nasia Gomi, ku Cesária Évora, ku Bana, entri otus, na komandu di frénti.

Na literatura, Nhu Eujéniu, purmeru, y Ovídiu Martins, dipôs, es abri-l kaminhu pa el alkansa riba-l txada.

Na múzika, trokadu alguns konpozitoris sima B. Léza y Manuel d’Novas, kunpanhadu pa un katréfa di intérpretis ku otus konpozitor, diskubridu beléza di si ritmu y partikularidadi di si melodia.

Oji, na investigason, nasionais y alguns stranjerus sa-ta koloka pédra pa pédra na diskubérta di si skrita, di si gramátika, di si sintasi y di si semântika.

Dja txiga maré di nos tudu kanta INU DI NOS SINGULARIDADI.

Kabral skrebe, y ratunba pa tudu kantu di nos téra: “SOL, SORIS, VERDI KU MAR,/ SÉKLUS DI DÓR Y DI SPERANSA; KEL-LI É TÉRA DI NOS GENTIS-GRANDI! FRUTU DI NOS MON,/ DI FLOR DI NOS SANGI:/ EL É PRÓPI UN TÉRA KI NU KRE TXEU”.

Amílcar Spencer krisenta: KANTA IRMON, KANTA NHA ARMUN/ DJA KI LIBERDADI É INU Y ÓMI, EL, UN SERTÉZA”.

Kusé ki sa-ta falta-nu pa nos tudu nu obi y nu sigi lison di puétas, múzikus y tradisionalistas vizionáriu?

Kusé ki sa-ta falta-nu pa nu diskubri sentidu y mensájen di Amílcar Lopes Cabral y di Amílcar Spenser Lopes?

Mi, di nha ladu, N kanta sénpri, y kontinua ta kanta inu di nos singularidadi, di tradison y di stória kultural, sosial y antropolójiku di nha povu: na Diskrison Strutural di Lingua Kabuverdianu; na Odju d’Agu; na Introdução à Gramática do Crioulo; na O caboverdiano em 45 Lições; na Dicionário Bilingue Crioulo-Português; na Construção do Bilinguismo, na Profecias di Ali-Ben-Ténpu; na Formação do Crioulo – Matrizes Originárias; na Katikati pa Gran Bira Spiga; na Jornada Sen Ratornu (en kursu).

Nu ta pidi ken ki ka kre valoriza INU di nos SINGULARIDADI, pa el ka trapadja, nin pa el disgardise ken ki kre valoriza-l.

KANTA KRIOLU É KA SO KANTA NOS LIBERDADI Y DIGNIDADI. É KANTA NOS IDENTIDADI.

30 di Agostu di 2022