DIA KI TXUBA BEN

Fórti sabi!

Dia ki txuba ben, N ta bai buska-bu pa nu ben selebra es alegria di tamanhu di nos speransa.

Ta kontise ki oji, 27 di Agostu di 2022, txuba fórti ben surprende-nu kuandu nos speransa dja staba kuazi ta nafraga.

N xinti sábi pamodi N sabe ma nha povu sta kontenti y, sobritudu, el sta konfianti ma anu, si ka ser fadjadu pa xuxú, el ta ser ramediadu, dimé-divéra: kumida ka ta falta, fómi ta kaba na nada, dizenvolvimentu ta enpodera, sabura ta djondja, batuku ta tenpra na tereru.

Obrigadu naturéza. Bo bu ka sabe diskrimina sima na pulítiika ta kustuma kontise. Dja txiga óra di nu tra lison di naturéza pa, sima el, nu dexa di fase diskriminason na trabadju, na justisa, na adiministrason, na diféza y promoson di demokrasia y di sidadania.

Dia ki txuba ben, y oji el kaba pa ben, N kre festeja ku tudu nhas patrísiu, kes ki ka sta filiadu na ninhun partidu y kes ki é militanti di PAICV, di MpD ô di UCID pamodi nhos tudu so nhos ten razon di ser si nhos ser un instrumentu pa promoson di Stadu di Direitu Demokrátiku, pa enpoderamentu y konsolidason di sidadania.

Nhos sigi lison di txuba, si nhos ka kre panha séka purifikador, sima kel di karastia di txuba, na ténpu di azágua minguadu y di anu nikilétu.