KONTRADISON DI TXIKU SPÉRTU

 

Eleison ta ganhadu y ta perdedu. Na DEMOKRASIA, Povu ki ta manda, óki ningen ka tenta ngane-l, nen tra purbetu di si frajilidadi.

Na un rinkon kualker di planéta, un Korénti spontániu ganha eleison, trokadu dos razon fundamental: a) povu dja staba kansadu di prátikas monolítiku di pulítika y di alguns vísiu di enton poder instaladu; b) alguns dizertoris di es prátikas konvense povu ma vizon y ativu di Partidu ki luta y vense duminason ejemóniku, na ses rubera, éra piór ki diabu na Inférnu.

Maiór párti di es dizertoris komesa ta odja ses kabésa komu uns “anjinhu” (salvu alguns exseson) y ses adiversáriu komu uns “diabinhus”, salvu alguns exseson, tanbe.

U-ki é mésmu stranhu é ki ses “mondon”, ku medu di si prátikas di pasadu ser diskubértu, dja el troka si própi nómi di batismu, ku kel di un árbitru ki, óki sta “em mangas de camisa”, ta djuga y ta pita, omésmu ténpu, na análizi di un si konpanheru di jornada, diziludidu ku el.

Rasentimenti, na un vídeo, es mondon di mundu, ki disidi kandidata pa un “Olinpu kualker”, sen ninhun pónta di rasponsabilidadi, el diklara ma, na kualidadi di altu funsionáriu di Stadu, el kolabora, sin, ku “rijimi monolítiku di pulítika” pamodi funsons adiministrativu ki el ta izerseba ta izijiba kel-la.

Komu el ka txiga di ser ménbru di govérnu, nen diputadu, antis di mudansa di rjimi, leis y prátikas ki enton vigora, ku si kunplisidadi tékniku, ka pode ser di si rasponsabilidadi, el konklui, pamodi ka foi el ki aprova-s, mas sin, governantis y deputadus.

Más: el fla inda ma un di kes lei raformista ki aprovadu y ki, na un sértu rubera, devidu dizinformason y instigason provoka rabelion, éra un lei atual y modérnu, dja ki el ta preveba nasionalizason, a-partir di un sértu limiti, y indiminizason di propritárius.

Anton, pa el, ka ta fase sentidu rasponsabiliza-l, negativamenti, pa asesoria ki el da na feitura di un tal lei.

Es kandidatu pa tribuna di “Olinpu” atxa ma intilijenti é so el; ma nos otu nu ka ten kapasidadi di rasiosina. Si el asesora governantis ki aprova lei, dja ki el ta dizinpenhaba un kargu públiku, pamodi ki, na diskordánsia di un diploma, ô di un prátika profundamenti injustu, el kontínua ta da si asesoria, el ka tevi korájen di pidi dimison di kargu!!!!?

Si lei di rafórma pa okupason di téra éra atual y justu, pamodi ki el foi “bandera y iska”, na eleison subsekuenti, pa distrui y umilha promotoris di lei, txeu di es konpletamenti inosenti!!!.

Ka basta muda “nómi di batismu” pa “nominhu di rua”, pa paga stória ki nu sta envolvidu na el, di pé sai kabésa.

Un Konsedju: na nos rinkon di es dés prinsezinhas, tudu es formozinhas, nu asumi, integralmenti, nos stória di luta y raziliénsia; nu rakonhise nos érus pa nu pode evita-s; nu valoriza nos prezenti di luta, pa más liberdadi y más inkluzon; nu trabalha pa nos futuru ser kada bes midjór: na dizenvolvimentu; na liberdadi; na inkluzon y ekuidadi.

Dja txiga ténpu di nu po juís na kabésa y di trabadja pa un patamar di DEMOKRASIA MÁS ELEVADU.

Pa es nóbri taréfa, nos tudu debe ser fidju di déntu ki ta djuga bóla di dizenvolvimentu integral, na un konpetison síviku, y nãu na un djogu brutu y disleal, entri “pédra ku garafa”; entri "fidjus di déntu ku di fóra".

Pa ningen ka skese: NOS TUDU É SER UMANU, DI UN MÉSMU RINKON, KU IGUAL DIREITUS Y DEVERIS, KONSAGRADU NA KONTITUISON DI REPÚBLIKA.

Nu ka ta kansa di rapiti: NU DJUNTA MON na trabadju; nu rafliti ku KABÉSA; nu AJI KU KURASON pa, djuntu ku kandidatu ki nu skodje, pa po órden na "OLINPU, nu koloka nos Rinkon Riba La: na dizenvolvimentu, na inkluzon, na saúdi, na edukason, na justisa, na Stadu di Direitu Demokrátiku.

Praia, 23/08/2021