KA NHOS STRAGA MORABÉZA DI NOS POVU

 

Pulítikus di Kabuverdi:

Nhos toma xintidu,nhos kaba ku nosentésa, nhos dexa di straga Morabéza di nos povu, un di kes aspétu más ralevanti ki ta karateriza nos vivénsia, nos kriolidadi. Si un dia violénsia radikal bate-nu na porta, kulpadu é nhos. Dipôs k anhos fla ma nhos ka avizadu.

Nhos elelejedu pa raprizenta povu, pa buska soluson di  prubléma ki sta fóra di ses alkansi, y nãu pa sta so na rénga-rénga, na puxa-puxa,  ku kunpanheru, sima gatu ku katxor, óki un pupa, kelotu ta djata más rixu pa pode obidu.

Ningen ka más ki kelotu: na ónra,  na dignidadi, na ruspetu y aplikason di lei, na dever y direitus konstitusional, na benefísius y izijénsias di Stadu di Direitu Demokrátiku.

Pamodi ki atuason di Opozison y di Situason ta avaliadu, kuazi sénpri, nãu na sentidu di “djuntamon”, ki ta karatariza nos povu, mas na sentidu di konpetison disleal, di gólpi baxu, di trankada sukundidu!?

 Na Govérnu, é si; na Kanbras, é si; na organizasons ekonómiku, sosial y edukasional, é si.

É pa fla: DJA TXIGA!

VIOLÉNSIA RADIKAL PODE SA TA SPRETA-NU!

Nhos toma juís si nhos ka kre pa POVU manda nhos, tudu fépu, pa ba tonba na rótxa runhu; pa ba spanta la pa fundu di “stótxa” runhu, kenti y fédi.

Nen tudu pulítiku ka malkonxedu. Pa kenha ki ta fase pulítika linpu; pa ken ki ka ta roba nin ka ta dilapida património di  Stadu; pa ken ki “puder” é un sirbisu sosial y nãu un lóka pa enrikisimentu pessoal, Kabuverdi é rakonhisidu y, ku es, nos povu ta ser sénpri daguma.

Ku puéta Jorge Barbosa, na puéma “Sinplisidadi”, nu ta gostaba di fla pulítikus pa inkarna pedagojia di es sinplisidadi:

“Mi, N kreba ser sinplis naturalmenti / sen intenson di ser sinplis // Asi, N ta prendeba sufri ku más kalma / Y N ta riba ku más grasa // N ta amaba sen fika djardjaridu (…) // Mi, N kreba ser sinplis / Y N ta viveba / sen egoísmu, sen ódius, sen invéja, sen xintidu kansadu // Nha felisidadi / ka ta strobaba ningen / ka ta kobada ninhun patrísiu nen blasfémia ka ta renaba / na nhas óra más trankadu””.

 

Un pulítiku ki inspira na pedagojia di Jorge Barbosa, si povu ta aklama-l,  si re-eleison ta kontínua garantidu y MORABÉZA di nos POVU ta bira bisós, “déntu sol ka ta murutxa, déntu d’agu ta da rabénta”.

 

4 di Julhu di 2021

Manuel Veiga