DIZAFORADA SI!

Nha Flana ben di lonji.

Pa undi el pasa, el spadja si kabalindadi.

Koróna-virus pa uns, COVID 19, pa otus.

Di Wuhan, na Xina, el lastra pa mundu fóra.

Foi na Febreru di 2020. Ningen ka staba purparadu.

Na fronteras, el tadjadu ku pó na róstu;

Dizaforada sima el é, el entra simé:

Na Itália, na Spanha, na Alemanha y Purtugal foi pániku jeral.

Na Mérka, Prizidenti Donaldo Trump manda fitxa frontera di y pa Európa.

Ku skólas enseradu; ku konpanhias di viájen na risku di falénsia;

Ku ospitais borotadu; ku alguns profisional di saúdi sgotadus;

Ku persentájen di dizinprégu ta subi, manenti-manenti;

Ku turismu ta nplora sokoru;

Ku prokura dizinfreadu di maskras di proteson y di alguns otu produtu,

Ku atividadis sosiokultural anuladu ô adiadu,

Nha flana soma na pórta di Kabuverdi, katxor di guarda spanta ku el.

Skolégu, ajentis sanitáriu diskunfia di si manobra;

Diskubridu alguns sintoma ki podeba razulta di si kabalindadi.

Purmeru vítima foi nos “Prémio Camões”, na S. Visenti.

Filismenti, razultadu di análizi da negativu.

Kriolus ki ta bazôfia ka ten medu di nada, es xinti aliviadu, rakonfortadu própi.

Mésmu si, ajentis sanitáriu kontínua skolégu, povu mante vijilanti.
Nha Flana sta pa dizaforada, mas, na nos kaminhu, nu ka kre kruza ku el;
Na nos kaza, nu ka kre abri-l pórta; na nos konvíviu, nu ka kre onbra ku el.
Obrigadu tudu kenha ki libra-nu di trabesura di nha Flana.
Ken ki vense dizafiu di fómi. Ken ki skonjura krueldadi di skravatura y kolonialismu;

Ken ki finka bandera di indipendénsia y di dizenvolvimentu riba la;

Ken ki ku trabadju, sangi y diterminason, konkista nos liberdadi y dignidadi;

Ken ki foi kapás di tudu kel-la, ka pode baxa kabésa dianti di nha Flana.

Anton, sen pániku, ku diterminason, ku siénsa y konsiénsa na petu, nu grita rixu:

Nha Flana, el kre ô el ka kre, na nos téra, si el entra, el ta panha bariga-baxu. 

El ta sturika própi, el ku si kabalindadi ku tudu. N fla, sta fladu!