"Já Não Somos Os Flagelados do Vento Leste":

A  HUMANIDADE  COMO  FAMÍLIA

Ali-Ben-Ténpu, un rankarnason di Nhu Naxu, dja flaba ma kusas tinha ki muda.

Naverdadi, murgudjadu na si pensamentus, el odja sima ki séu dixi, mar labanta y téra submerje. Tudu ki éra negativu bai pa fundu di mar. Tudu ki éra puzitivu fika ta boia entri séu y mar. Na es senáriu, kusas bira tudu diferenti: kubisa ku egoísmu kaba. Puder ku rikézas fika tudu fraternalmenti rapartidu. Géras ku gólpis di Stadu fika so na stória. Skravatura, splorason, emigrason forsadu, stremismus na pulítika y na sosiadadi sivil, terorismu, radikalismu relijiozu, banditismu, “bullying” na instituisons di ensinu, violénsia doméstiku y sivil, organizasons di stupifasienti, tudu es, forsa di óndas y gravidadi di téra pintxa-s pa fundu di osianus undi, fogadu, es bai purifika di ses pekadu.

Un mundu nobu ranase: amor, djustisa, fraternidadi, solidariedadi pasa ta reina na tudu lar, na tudu instituison, na tudu asosiason pulítiku y kultural, na tudu organizason sosial y ikunómiku.

Filisidadi pasa ta ser un ben di purmeru nisisidadi y un direitu fundamental konsagradu na Konstituison di tudu nason di mundu (MV (2019). Profecias do Ali-Ben-Ténpu,Acácia Editora, p.143).

Na Baía Azul, un puéta vizionáriu, sima Ali-Ben-Ténpu, vatisina si, tanbe:

“… Mesmo que o céu não chova/ E o Sol e a Lua/ sejam/ cordas partidas no violão da ilha/ Mesmo que a chuva seja esta noiva de usura/ Este umbigo/ Esta corola de ausência/ Entre a rocha e o rosto/ Mesmo/ Que o vento vergue/ No eixo da terra E nos mastros da alma/ Os ossos & séculos de sangue & secura/ Mesmo sendo! Já não somos / Os flage¬lados do vento leste” (Corsino Fortes).

Vatisíniu di es dos vizionáriu dja nu komesa ta odja. Koronavirus ben fla-nu ma kusas ten ki muda. Anton, konviti é pa nu abri odju, pa nu prende lison di fase di Humanidadi un família. So di es manera mundu pode proclama: “Já não somos/Os flagelados do vento leste”.