VIDA

VIDA Y MÓRTI
Un Don, Un Gazadju, Un Dizafiu

Don di Naturéza

         Pa ser umanu, vida é un don di Naturéza

         Sen ninhun sforsu, di nos párti, el surji

         Ku tudu si potensialidadi latenti y imanenti

         Ku tudu si virtualidadi na ténpu y na spasu.

Gazadju sen Interferénsa

         Es don, si nu seta-l y anbrasa-l, el é un gazadju

El pode ser kultivadu y valorizadu

El pode ser fekundadu y vitaminadu

El pode da rabénta, ramifika y frutifika

Nível di Spreson

         Vida é sima arku-da-bedja

Ku spreson variadu, ku nível diferenti:

         Vejetal, Animal, Umanu,  kada un di si manera

Y un otu, inda, ki ta skapa nos entendimentu

Pa Fé, el é superior, pa Grasa el é  Spiritual

Dizafiu Jeral

         Pa nível vejetal, ka ten dizafiu

          Planta ta nase, ta kria, ta frutifika, ta móre

É un don di natureza tudu es kaminhada.

Pa animal, don é más grandi,

Diferenti di planta

El ten, a-más, instintu, un gazadju di naturéza.

Trokadu es gazadju, el ta realiza alguns movimentu:

Di difende y proteje si kabésa, di afaga y agrada ken ki ama-l

Tudu kel-li sen konsiénsa, mas ku instintu y sentimentu.

Diferenti di aplanta ku animal é ser umanu.

El ta benefisia di don y di gazadju ki es rasebe

Mas di-sel é más grandi.

Vontadi y puder di rasiosina, so el ki ten

Pur isu, si dizafiu, tanbe, é más grandi:

Di konxe dretu ku mariadu

Di disidi na ténpu y na spasu

Di sunha, di planifika, di trasa stratéjia

Di ten konsiénsa di si própi kaminhada: nase, kria, móre

Di ralasiona na imanénsia y ku Transendénsia.

Negason di Vida

         Ladu opostu di vida é mórti

         Tudu ser vivu ta móre un dia

Ser umanu é úniku ki ta kridita na un otu vida.

So ku Fé ta txigadu la

U-k’infor, na Téra, mórti é negason di vida.

Infilismenti, txeu di nos ka ta seta-l, trankuilamenti

Mas, sima naturalmenti nu ta nase

Simé, tanbe, nu ta móre, nu kre ô nu ka kre.

Kel-li é inivitável, y é inútil xinti medu ô angústia

Óra, si ku mórti, na es vida, tudu ta kaba

É un verdadi, tanbe, ma ku el

Na un otu dimenson, nu ta entra

Sen vontadi nen razon

Sen sonhu y sen stratéjia izistensial.

Kondison Umanu

         Ka ten otu djazigu: nu ta nase, nu ta kria,

Nu ta raproduzi, kaba, nu ta móre.

         Kel-li k’é kondison umanu

Sabedoria é seta-l, naturalmenti,

Sen medu, sen angústia, sen sufrimentu.

Naturéza ki fase-nu si, ka nu kontraria-l

Ka nu straga, ku nosentésa ku tudu, es don, es gazadju.

Anton, nu koloka Vida y Mórti, na lugar ki es merese, naturalmenti:

Un sonhu pa mamanta, un dizígniu pa alkansa

Ku ruspetu di Fé na Mórti, komésu di un nobu Vida

Mas kel-la é otu azágua, otu ermenêutika.

Dja N fla, sta fladu, ku abertura pa midjór intendimentu.

                                                       Manuel Veiga

                                                         29/03/2020