UMANISMU  KRIOLU

RAKONHISIMENTU-L  POVU

Mundu sa ta bira kada bes más kriolu

Prétu, branku, burmedju…

Umanidadi di tudu kor, rasa y krédu

Dja es djunta, dja es korpora, kóntra Covid 19

                        Forsa di kriolu sta na sangi ku idéias stramadu

                        Sen rasismu, nin diskriminason

                        Sen mania di mondon ku kanpion

                        Ku umildadi y solidariedadi

                        Ku inkluzon y dignidadi

Foi si, na Nórti ku na Sul di Planéta

Si sa ta ser na Lésti y na Oésti di Globu

Pa tudu banda, omésmu gritu di indignason

Pa tudu ladu unidus y solidárius kóntra COVID 19

                        Na es géra pa vida, kóntra mórti

                        Na es luta antiviral, anti letal

Kontributu fórti di profissionais di saúdi

Partisipason notóriu di forsas di suguransa

Trabadju meritóriu di komunikason sosial 

Ajuda disizivu di bonberus, voluntárius pa pás

É trokadu kel-li ki Umanismu kriolu bale oru

Povu rakonhisidu ta agradise:

Dedikason y lágrimas di profisionais di saúdi

Suparason forsadu pa stanka kontaminason

Konfinamentu na kaza pa laba mon

Kuarenténa dekretadu pa spanta pandemia

Ekonomia paralizadu pa sanidadi kria

Akademia fitxadu pa evita kontaminason

Povu rakonhisidu ku solidariedadi kriolu

                        Kabalindadi di COVID 19 inda ka kaba

                        Pur isu, umanismu kriolu ben pa fika

                        Solidariedadi universal debe finka bandera

                        Obrigadu, nha povu, obrigadu Umanidadi

                        Viva djunta mon vital kóntra Covid letal

                        VIVA  UMANISMU KRIOLU, VIVA VIDA

Manuel Veiga

9/4/2020