KABUVERDIANU, NHA POVU
DJA BU GRANDI DJA!
Priviléjiu di nase y di kria, tirsidjadu, mas karixadu
“Nas
es dés granzinhu di Téra”
Spadjadu
na mar, y prindadu na planéta
Foi un prénda,
un gazadju di Univérsu
Povu balenti,
rizilienti y lutador
Povu
trabadjador, studiozu y sunhador
Insatisfetu,
enprendedor y ganhador
Undi
ki el bai e dexa si marka
Mas
é na Téra ki el rajista si patenti
Na
karastia di txuba, el emigra pa téra-lonji
Na
azágua fadjadu, el djunta mon, el labra txon
Na anu
kansadu, el sunha ku sol ta nase na orizonti
Ku
txon modjadu, “si speransa bira kor di
fodjada”
Si
stória sufridu, si vida nhanhidu
Si
luta, staradu-bai
El vense, el sa ta
vense manenti
Ku
forsa di si kultura transadu
Ku
inerjia di si tradison euro-afrikanu
Ku
gramátika di si dos língua ta buska paridadi
Ku si bilingismu
en konstruson
Ku fómi di
multilingismu dialoganti
Sobriviventi
di tudu kalamidadi
Sima
kes di fómi, na dékada di 1940
Rezistenti
na époka kolonial-faxsista
Konkistador
di si própi Indipendénsia, na 1975
Konstrutor,
désdi 1991, di un Stadu di Direitu Multipartidáriu
Amannti
di liberdadi y di dignidadi pa tudu algen
Bu sonhu, inda, é
un prosésu
Manhan
é pa ser midjór ki oji
Ku
más liberdadi, más dignidadi konkistadu
Ku
más konhisimentu, más sabedoria adikiridu
Ku
más dizenvolvimentu, enpregu y kualidadi di vida
Ku
más ves y vós na merkadu di sidadania
Ku más umanismu, inkluzon y paridadi di
jéneru
Ku
más saúdi, ménus violénsia, sen epidemia mental ô korporal
É
trokadu tudu kel-li, Kabuverdianu nha Povu
Ki
dja bu grandi dja!
Di
nha párti, un kusa, N ta promete-u:
Ser un
filhu konprometidu ku bu stória y kultura
Ser
amanti y difensor di língua di bu identidadi más fórti
Ser un sidadon
global, abértu pa valoris di Umanidadi
Ser un
kabuverdianu amigu di povu, di si Mar y Téra
Y si N ka fadja es
konpromisu
Sinplismenti N
kunpri un dever di sidadon-patrióta.
8 di Abril di 2020
Manuel Veiga
Sem comentários:
Enviar um comentário