SOLIDARIEDADI

Y

 LISON  DI  COVID   19

Pa nu nase, nos projenitoris  djunta mon

Nu kria na petu di nos mãi y ku  suór di nos pai

Pa nu prende anda, algen sende-nu podogó

Nos purmeru méstri foi nos mãi

Nos purmeru gia foi nos pai y nos povu

Na infánsia, nu brinka ku koleginhas y purmerus létra

Na adolesénsia, nu  ba ta prende ku otus méstris

Nu studa na livrus y manuais

Nu pasa na izami, nu tra kursu, nu atxa trabadju

Na tudu nos perkursu, txeu algen stende-nu mon:

Agrikultor y lavrador di téra

Enjinherus, arkitétus, padris y médikus

Artistas, jornalistas, puétas y skritoris

Governantis, pulítikus y ekonomistas

Instituisons di saúdi, di ensinu y di kréditu

Organizasons di seguru y di difésa di trabadjadoris
Klubis disportivu y asosiasons filantrópikus
Parlamentu, tribunais y sistémas di justisa

Rodiadu di solidariedadi, Umanidadi é un Família

Bira si, mondon ku kanpion skese di djunta mon

Pobréza, mizéria, violénsia lastra na txada

Krimi anbiental y ekolójiku spadja, rabés

Apokalípsi soma, skolégu, na orizonti

Covid 19, un pandemia dizaforadu, ben lembra-nu:

Sen solidariedadi, Umanidadi ka nun kusa

Y pa el ser obidu, el ataka mármi, sen skodjénsa

Moredu monti, monti; mas speransa labanta taan!

Anton, Umanidadi torna bira solidaráriu

Ken ki ten más, bira ta kebe ku "koitadu"

Covid 19 fika sen gas pa sufoka y pa ataka

Un mundu, kada bes más solidáriu, parse na orizonti

Di novu, Umanidadi bira un Família

Y solidariedadi, permanentimenti, un atitudi

                                                                       Manuel Veiga

                                                                          6/04/2020