LABRADOR  DI  NHA  RUBERA

Ku nxada, nkunhadu, riba d’ónbru

Kalsa, ramangadu, baxu-l duedju

Bóina bédju, pa tadja sol

Anti-l maxe, róstu pa kanpu

Ku fé n’azágua ser fadjadu

Fórti, dja N kre-bu txeu

Lavrador di nha kutélu!

Ku fé na txuba, medu-l stiájen

Bu djunta mon, trabadju avansa

Na sol, na txuba, kontu ka ten

Si ka da txeu, ku poku bu ta konsola

Dia ta sai, anu ta entra, un tras d'otu

Ngarnel, óra subi, óra dixi, unbês-bai

Bu feramenta, nxada agudu ku bóka largu

Bu pónta txon, lugar di santxu ku pelada

Si spiga ka ganha, padja limária ta ten

Ku Diós ô Naturéza, flipa ka meste

Fé y speransa é midjór kaminhu

Ganha “parada”, ka so ku reziliénsia

Dja txiga óra moderniza y industrializa

Ku txon modjadu, midju ta nase

Ku mónda y ramónda, sapatinha ta flora

Sen stiájen, bolonbolu  ngrosa kabésa

Azágua korenti, rakunpénsa bu sforsu

Kodjéta fadjadu so na vólta d’anu

Bu al "subi Riba pa kóre papel”

Noiba na séntu, fogeti na ar

Sábi ta djondja, batuku ta rapika

Ku amigus y bizinhus tudu rodiadu

Morgedjadu, noivus fuxi, kanba kutétu
Stá na óra  ba da kónta di ses nobu.

Labrador di nha kutélu bo é filís

Ku txeu ô poku, konsoladu y gardisedu

Fórti txeu, dja N kre-bu txeu, sima bilida di nh’odju

Kabuverdi ta agradise-u, ta insentiva-u

Réga, góta-góta, pa-u popa agu

Ka-u fuxi pa sidadi, nin pa Sul-a-baxu

Invisti na agrikultura y pekuária enprezarial

É midjor ki fuma padjinha ô pidi sumóla na béku-l rua.

Labra txon y kria limária, ta da-u susténtu, uni família

Sen violénsia nin kasubódi; sen dór di bai, sodadi-l volta

Ka bu skese da fidju skóla, y transmiti-l valoris

Si el ka da agrikultor, e pode ser agónomu, sima Kabral

Si el ka ser médiku, el pode da injinheru ô otu tékniku

Tudu profison é inportanti; tudu trabadju ta dignifika

Labrador di nha téra:

Sen bu trabadju, nha méza éra más póbri

Sen bu fé y razilénsia, nha povu fépu ta nafragá

Sen  armonia y ekílibriu, nu staba tudu dixanxabidu

Konhisimentu ka so na skóla y universidadi

Na kanpu me, tanbe, sabedoria ten, fartura izisti

Obrigadu, mésmu, labrador di nha téra!

Trokadu bo, nha téra k'é más skalabradu

 Kridita: dimé-divéra, N ta ama-u, N kre-u txeu!

Manuel Veiga

13/4/2020