“KABUVERDI  DI  SPERANSA”

Ka mi ki fla, artista ki kanta:

“Nos Kabuverdi di speransa”

Nu djunta mon, nu leba-l pa dianti

Ka ten ninhun COVIC más fórti ki nos

Nos stória foi sénpri si

Óra dretu, óra mariadu

Speransa tioxi ka falta-nu

Nu ka skese djunta mon.

Na séka ku stiájen, nu luta, nu ganha

Na duminason-splorason, disididu, nu razisti

Na pandemia, nu sa ta trisa, nu ta vense

Si nu ara kaminhu, nu ta muda di rumu

Si nu sta konfianti y diterminadu

É pamodi “nos speransa ten kor di fodjada”

Nu ka inventa nada, puéta ki skrebe

Ónti y oji foi si, manhan k’al ser diferenti:

Nos sonhu ten ki realiza, nos téra ten ki liberta

Nos povu ten ki skese pandemia y sai di konfinamentu

Turismu ta rakomesa ku más forsa

Enprégu ta omenta y ta diversifika

Studantis ta ratoma banku di skóla y di universidadi
Artistas, inspiradu y motivadu, ta torna subi palku

Enprezárius ta multiplika volumi di nogósiu

Guvérnu ta  invisti más na justisa, saúdi, investigason y idukason

Sosiedadi, más saudável y kualifikadu, ta bira más filís

Kresimentu ta omenta, dizenvolvimentu ta spadja

Kabuverdi di speransa ta bira un vivénsia, un sertéza.

E ka mi so ki sunha y pensa si!

Artista dja kantaba y pueta dja skrebeba:

“Nos Kabuverdi di speransa” nu ten ki djunta mon

Na fartura ô karastia,“Nos speransa ten kor di fodjada”

Anton, nha sonhu ka fantazia y ku Kabral, N ta ratunba
Mansinhu y konpasadu, sima raki-raki  na pedregal:

“Venha comigo, Mamãe Velha, venha,

Recobre a força  e chegue ao portão.

A chuva amiga já falou mantenha

E bate dentro do meu coração!”

Manuel Veiga

17/4/2020